DILI, STLTIMORLESTE.com – Papel feto importante iha dezenvolvimentu nasaun, no partisipasaun feto la’ós atu kompete ho mane, maibé servisu hamutuk no tau forsa hamutuk hodi dezenvolve nasaun ba oin.
Tuir feto potensial Maria Amaral, ba STL Kuarta (23/09/2026) hatete katak dala barak ema hanoin igualdade jéneru nu’udar asuntu ida ne’ebé kona-ba feto de’it. Maibé, tuir nia, igualdade jéneru signifika feto ho mane hotu fahe esperiénsia ba malu, hahú husi família to’o nasaun.
“Labele halo diskriminasaun tanba nia feto ka mane, maibé haree ba kapasidade, no feto bele partisipa iha dezenvolvimentu nasaun no bele mos iha família hanesan mos mane, no feto nia partisipasaun iha dezenvolvimentu atu kontribui laos atu kompete malu ho mane” dehan nia.
Nia dehan, feto hasoru bareira oin oin tantu iha sosiedade no partisipa iha dezenvolvimentu nasaun maibé ho bareira sira nee mos lataka dalan ba feto atu luta ba oin.
“Lei garante ema hotu bele hola parte ba kompleta malu no feto nia partisipasaun atu kontribui ba nasaun hamutuk hodi dezenvolve rai nee ba oin.” katak nia.
Nunee mos Feto ho potensiál, Madalena C. Pereira, hatete katak feto ho mane iha direitu no obrigasaun hanesan atu kontribui ba dezenvolvimentu nasaun.
Nia subliña katak, involvimentu feto la’ós atu halo kompetisaun ho mane, maibé atu hamutuk tau forsa no kontribui ba dezenvolvimentu Timor-Leste.
“Mane sira mos hanoin katak feto ne’e moris husi tulan rusuk mane nian, entaun feto mos tenke partisipa iha dezenvolvimentu no reforsa ho mane, tanba feto sira mak hanesan mane sira nia inan, feton, bin, alin iha família. Tanba ne’e, la’ós kompete ba malu, maibé feto sira tenke halo duni servisu hanesan ne’e, tanba sira iha potensiál duni ba nasaun.” katak nia.
Madalena hatete papel feto importante tebes iha dezenvolvimentu nasaun. Tanba ne’e, feto sira la’ós atu kompete ho mane, maibé atu hamutuk ho mane sira hodi dezenvolve nasaun.
“Muito importante, ne’e labele duvida tan feto nia papel importante iha dezenvolvimentu nasaun,” dehan feto ho potensiál, Madalena.
Alende ne’e Prezidente Repúblika José Ramos-Horta hatete papel feto importante iha dezenvolvimentu nasional no konstrusaun Estadu. Tanba ne’e, nia husu Governu atu fó apoiu mos ba feto sira ne’ebé inklina an iha setor privadu.
“Papel feto importante. Ita hotu hatene importante tebes papel feto sira nian. Ha’u sempre partisipa iha eventu organizasaun feto iha negósiu, tinan-tinan ho Banku Mundiál, partisipa intensa, maibé loloos, para apoiu di’ak, Governu tenke tuur ho setor privadu, rona sira. Primeiru-Ministru halo ona iha Merkadu Lama iha fulan ruma liu ba. Rona tiha ona balun, maibé haree didi’ak oinsá mak bele apoiu,” dehan PR Horta.
(eme)
