DILI, STLTIMORLESTE.com – Deskonfia iha juís balun tenta hadau prosesu kazu droga husi juíza turnu nia liman, Leandro Isaac husu Konsellu Superiór Majistratura Judisiál atu halo investigasaun kle’an ba asuntu ne’e.
Eis Deputadu PSD no Eis Koordenadór CNRT ba Konsulta Populár 1999 ne’e hato’o pedidu ne’e, hafoin deskonfia ne’e mosu iha públiku nia leet iha loron hirak liu ba.
“Ha’u rona deskonfia ne’e iha li’ur. Ema dehan iha juís balun tenta hada’uk prosesu droga ne’e husi juíza turnu. Tanba ne’e ha’u husu Konsellu Superiór atu halo investigasaun kle’an,” dehan Leandro ba STL, iha Dili, Kuarta (23/09/2026).
Tuir nia, hahalok hanesan ne’e labele akontese tanba juís ida-idak iha independénsia.
“Juís mós ema, nuné, nia iha mós frakeza umana hodi monu iha tentasaun ba sala, nia la perfeitu. Tanba ne’e mak reforma judisiária presiza tebe-tebes,” nia tenik.
Iha parte seluk, Observadór Polítika, António Magno hateten deskonfia ne’e bele estraga konfiansa públiku ba justisa.
Nia dehan, se loos duni iha tentativa intervensaun, ida ne’e kontra ona prinsípiu independénsia judisiál.
“Juís ida-idak iha kompeténsia rasik. Labele iha intervensaun. Konsellu Superiór tenke klarifika lalais atu labele hamosu espekulasaun iha li’ur,” António subliña.
Entretantu, Akademista husi UNPAZ, Flávião Soares haree asuntu ne’e presiza analiza tuir regra judisiária.
Nia esplika, juíza turnu mak iha kompeténsia jere prosesu ne’ebé distribui ba nia.
“Se iha tentativa hada’uk, ne’e kestaun étika no dixiplinar. Presiza investigasaun ne’ebé kle’an no transparente hodi asegura justisa la’o ho loos,” Flávião hateten.
To’o notísia ne’e STL hatun, Tribunál Judisiál Primeira Instánsia Dili seidauk fó esklaresimentu ofisiál.
(car)
