BAUCAU, STLTIMORLESTE.com – Sekretáriadu Tékniku Administrasaun Eleitoral (STAE) Munisípiu Baucau destroi ona material eleitoral sensitivu no la sensitivu husi eleisaun 2022 no 2023.
Diretor STAE Munisípiu Baucau, Natividade Freitas Guterres hateten, material ne’ebé destroi mai husi Eleisaun Prezidensiál 2022, Eleisaun Parlamentár 2023 no Eleisaun Suku.
Nia hateten dokumentu no material eleitoral sira ne’e kaduka ona, nune’e tenki destroi tuir inventáriu no prosedimentu legal ne’ebé determina bazeia ba Artigu 68, númeru 2, husi Dekretu Governu Nú. 21/2017, 17 Maiu, no Artigu 55, númeru 2, husi Dekretu Governu Nú. 7/2017, 27 Fevereiru, kona-ba prosedimentu votasaun, kontajen no apuramentu rezultadu eleitoral.
“Atividade ida-ne’e hala’o bazeia ba responsabilidade ne’ebé atribui ba STAE, tuir dispozisaun legal kona-ba prosedimentu eleitoral.” Natividade hateten ba jornalista sira molok serimónia destruisaun iha resintu edifísiu STAE Baucau, Kuarta (23/09/2026).
Nia esplika responsabilidade destruisaun material eleitoral hala’o pelumenus tinan ida depois proklamasaun rezultadu eleisaun.
Ba boletin votu, prosesu destruisaun ne’e hetan autorizasaun husi Tribunal Rekursu antes hala’o destruisaun.
Autorizasaun ne’e liuhusi karta Ref. Nú. 71/SP.TR/IX/2026, datadu 8 Setembru 2026, tuir pedidu STAE Ref. Nú. 10/DG-STAE/MAE/VI/2026.
Pedidu STAE refere datadu 9 Juñu 2026, nu’udar parte husi prosesu administrativu atu hetan autorizasaun destruisaun material eleitoral.
Material ne’ebé destroi iha nivel munisípiu inklui boletin votu, ata, lista votantes no tinta indelível.
Inklui mos kartaun eleitoral ne’ebé rekolla durante atualizasaun baze dadus eleitoral no dokumentu eleitoral seluk ne’ebé kaduka ona.
Natividade hateten destruisaun material sira ne’e hala’o tuir inventáriu no prosedimentu ne’ebé determina ba jestaun material eleitoral.
“Material eleitoral sira, husi utilizasaun to’o eliminasaun, tenki jere ho responsabilidade, integridade, transparénsia no rastreabilidade,” Natividade katak
Nia subliña serimónia destruisaun la’ós de’it prosesu eliminasaun material, maibé konklui siklu jestaun material eleitoral husi eleisaun sira liubá.
Nia hateten prosesu ne’e mos sai parte husi preparasaun institusionál STAE atu hadi’a jestaun no prosedimentu eleitoral ba eleisaun futuru.
Preparasaun refere inklui Eleisaun Prezidensiál 2027, ne’ebé sei presiza jestaun material eleitoral ho responsabilidade no tuir prosedimentu legal.
Natividade hato’o agradesimentu ba CNE, STAE Nasionál, Tribunal Rekursu, Autoridade Munisípiu, PNTL no partidu polítiku sira.
Nia mos hato’o apresiasaun ba instituisaun hotu ne’ebé kontribui ba prosesu destruisaun material eleitoral ne’ebé hala’o ho transparénsia.
“Hau hato’o agradesimentu ba instituisaun hotu ne’ebé kontribui ba prosesu ida-ne’e ne’ebé hala’o ho transparénsia, livre no justu,” Natividade espresa
Diretór ne’e reafirma kompromisu STAE Munisípiu Baucau sei kontinua servisu ho imparsialidade, neutralidade, transparénsia no respeitu ba lei.
Nia hateten prinsipiu sira ne’e importante atu garante integridade no konfiansa públika iha administrasaun eleitoral.
Autoridade no partidu sai testemuña
Komandante Komando Polísia Munisípiu Baucau, Superintendente Xefe João Sancho Pires, marka prezensa iha serimónia destruisaun material eleitoral.
Reprezentante Prezidente Autoridade Munisípiu Baucau, Maria Celestina Viegas, mos partisipa hamutuk ho representante partidu polítiku sira.
João Sancho Pires hateten prezensa autoridade no representante partidu polítiku importante atu observa prosesu destruisaun material eleitoral.
“Ita mai partisipa destruisaun sasan sira ne’e atu sai matan no tilun ba prosesu ne’ebé hala’o iha STAE,” Katak Pires
Nia hateten material eleitoral sira arkiva iha STAE to’o hetan autorizasaun husi Tribunal Rekursu atu hala’o destruisaun.
Nia mos liga prosesu destruisaun ne’e ho preparasaun STAE ba eleisaun sira iha futuru.
Enkuantu ne’e, reprezentante Autoridade Munisípiu Baucau hateten serimónia ne’e importante tanba autoridade no lider partidu polítiku sai sasin.
“Serimónia ne’e importante tanba autoridade, seguransa no lider partidu polítiku hotu sai sasin ba destruisaun boletin votu,” Maria komenta
Serimónia destruisaun ne’e akompaña mos husi representante Komisaun Nasionál ba Eleisaun Munisípiu Baucau.
Prosesu destruisaun material eleitoral ne’e hetan apoiu seguransa husi Komando Polísia Munisípiu Baucau.
(tom)
