DILI, STLTIMORLESTE.com – Profesór nain 5 no Koordenadór Eskola Baziku Filial (EBF) Lequitura, Munisípiu Aileu, la tama eskola iha Kinta (17/09/2026), ho razaun asuntu família, nune’e estudante sira la hetan aula iha loron ne’ebá.
Diretora Servisu Edukasaun Munisípiu Aileu, Beatriz de Deus, hatete ba STL liu hosi telefone, Kuarta-feira (23/09/2026), katak iha loron ne’ebá, profesór nain lima no kordenadór eskola la tama servisu, enkuantu EBF Lequitura iha estudante besik 213.
“Loos duni, iha Kinta-feira, 17 Setembru, kordenadór eskola no profesór sira la tama eskola, abandona estudante sira. Estudante sira besik 213, no profesór ativu iha lima. Iha mós profesór ida moras prolongadu no iha ne’ebé sofre problema saúde mental. Koordenadór ida mós la tama. Tuir informasaun ne’ebé ami hetan, sira la tama hotu eskola ho razaun asuntu família,” dehan Beatriz.
Nia hatete katak, bainhira mentor to’o iha EBF Lequitura, nia informa kedas ba Servisu Edukasaun kona-ba situasaun ne’e. Depois, inspektór sira mós ba eskola atu halo verifikasaun.
“Inspektór sira foti kedas viatura ba EBF Lequitura atu haree situasaun. Bainhira inspektór no mentor to’o iha fatin, sira fó informasaun katak profesór sira la tama ho razaun asuntu família,” nia afirma.
Beatriz hatete katak, iha momentu ne’ebá, iha profesór estajiáriu ida ne’ebé hanorin iha nível terseiru siklu. Depois de merenda, estudante sira fila ba uma, maibé prosesu ensinu-aprendizajen kontinua lao normal iha loron sira tuirmai.
Nia mós esplika katak, iha Sexta-feira, diretór eskola sentru ba EBF Lequitura ba kedas iha fatin atu haree situasaun no hasoru grupu sira, depois de simu informasaun kona-ba kordenadór no profesór sira ne’ebé la tama eskola.
Iha parte seluk, Deputada Cristina Yuri Rebelo hatete katak nia simu informasaun kona-ba kondisaun iha EBF Lequitura, inklui alegasaun katak iha Sexta-feira liubá, mentor sira to’o iha eskola besik tuku 10 dadeer, enkuantu eskola sei taka hela no profesór ba klase 2 to’o 6 la iha.
“Hau simu informasaun kona-ba EBF Lequitura, iha Munisípiu Aileu, katak iha Sexta-feira liubá, bainhira mentor sira to’o iha eskola besik tuku 10 dadeer, eskola sei taka hela no profesór ba klase 2 to’o 6 la iha,” hatete Cristina Yuri Rebelo.
Deputada ne’e husu Servisu Edukasaun Munisípiu Aileu atu fó atensaun séria ba prezensa no responsabilidade profesór sira, tanba eskola tenki sai fatin ba estudante sira atu aprende no aumenta sira-nia koñesimentu.
“Se informasaun ida-ne’e loos no akontese dala barak, situasaun ida-ne’e tenki hetan atensaun séria hosi Ministériu no Servisu Edukasaun Munisípiu. Tanba eskola la’ós de’it edifísiu; eskola mak fatin ne’ebé labarik sira tenki hetan direitu atu aprende,” dehan nia.
Nia mós alerta katak, auzénsia profesór no interrupsaun prosesu ensinu-aprendizajen, liuliu iha komunidade rurál, bele aumenta lakuna aprendizajen entre estudante sira iha área rurál no urbana.
Cristina Yuri Rebelo husu atu iha sistema kontrolu no responsabilizasaun ne’ebé justu no efetivu, hodi garante profesór sira kumpri sira-nia responsabilidade.
“Hau husu sistema kontrolu no responsabilizasaun ne’ebé justu no efetivu. Ministériu tenki halo verifikasaun imediata kona-ba situasaun EBF Lequitura, haree frekuénsia profesór sira, rona rasik komunidade no dirijente eskola, no se iha problema, identifika nia kauza no fó solusaun,” dehan nia.
Hatan ba preokupasaun deputada Cristina Yuri Rebelo, Vise-Ministru Asuntu Parlamentár, Aderito Hugo, kompromete atu hato’o preokupasaun ne’e ba Ministériu Edukasaun, hodi bele fó atensaun ba situasaun iha EBF Lequitura.
“Preokupasaun deputada Yuri nian kona-ba edukasaun, kuandu halo fiskalizasaun iha EBF Lequitura, hau hanoin sei haruka ba Senhora Ministra Edukasaun hodi bele tau atensaun,” hatete Aderito Hugo.
(jac)
