DILI, STLTIMORLESTE.com – Estudantes presiza muda karakter no hahalok, hodi bele evita no hadook an husi konflitu, tanba estudantes mak futuru ba nasaun.
Diretór Eskola Sekundária Jerál Públika (ESGP) 10 de Dezembro Comoro, Manuel Verdial, hatete ba STL iha nia fatin servisu, Kuarta-feira (23/09/2026), katak muda karakter ema nian presiza pasiénsia no prosesu ne’ebé la lalais.
“Ita la muda ema nia karakter iha tempu badak. Presiza pasiénsia, tanba ita iha tempu limitadu. Maibé hahalok ruma tenke muda liuhusi sistema, atu nune’e ita bele haree labarik sira nia mudansa no problema sira nian bele menus,” dehan Manuel.
Nia hatete katak, bainhira problema mosu iha eskola, lideransa no profesór sira presiza servisu hamutuk atu rezolve problema.
“Ita presiza servisu ekipa. Profesór sira laos ba hanorin deit to’o oras aula remata, maibé bainhira problema ruma mosu, presiza fó atensaun no servisu hamutuk ho lideransa atu rezolve,” nia hatete.
Manuel aumenta katak, profesór sira presiza hatene karakter estudantes ida-idak, hodi bele fó orientasaun ne’ebé apropriadu.
Entretantu, Diretór ESGP Finantil, Aniceto Berlelo, hatete katak iha tempu liubá estudantes husi ESGP Finantil no ESGP 10 de Dezembro Comoro dala ruma hein malu iha dalan no tuda malu.
“Uluk ami nia estudantes ho estudantes 10 de Dezembro hein malu iha dalan, dala ruma tuda malu. Maibé agora la hanesan uluk tanba estudantes sira hahú iha ona konsiénsia,” dehan Aniceto.
Enkuantu, Diretór ESGP No. 4 de Setembro Balide, Sergio da Cruz, hatete katak uluk estudantes husi nia eskola ho estudantes husi Eskola Nobel da Paz dala ruma hamosu problema bainhira sai husi eskola no hein malu iha estrada.
Nia dehan, hanesan diretór, nafatin fó orientasaun ba estudantes atu hadook an husi konflitu, tanba muda karakter estudante presiza orientasaun no konsellu ne’ebé kontinua.
(jac)
