DILI, STLTIMORLESTE.com – Estudantes husi Eskola Sekundária Jerál Públika (ESGP) 10 de Dezembro Comoro prepara an atu tuir Ezame Nasional no Ezame Lokal ne’ebé sei hala’o iha loron 19 Outubru 2026.
Diretór ESGP 10 de Dezembro Comoro, Manuel Verdial, hatete ba STL iha nia fatin servisu, Kuarta-feira (23/09/2026), katak estudantes sira prontu ona atu partisipa iha ezame, maski eskola seidauk iha orsamentu ba preparasaun espesífika.
“Konaba preparasaun ba Ezame Nasional, maski agora dadaun seidauk iha orsamentu, ida-ne’e laos ami nia eskola deit, maibé eskola hotu. Ami nia estudantes sira preparadu atu partisipa iha Ezame Nasional, no lista estudantes hatama tiha ona tanba ami sei la simu tan estudante,” nia dehan.
Manuel informa katak, preparasaun ba ezame hahú tiha ona, tanba tempu ba estudantes atu partisipa iha ezame besik ona.
Nia hatete, atividade ensinu-aprendizajen iha sala aula kontinua lao diak hanesan bai-bain, hodi prepara estudantes sira ba ezame.
Enkuantu, estudante ESGP 10 de Dezembro Comoro, Natalia Menezes hatete, tempu ba ezame besik ona, nune’e nia esforsu an liuhusi estudu.
“Hau hanoin tempu lao dadaun, no loron ami atu hasoru Ezame Nasional no Ezame Lokal besik ona. Nudar estudante, hau hakas an estuda hodi nune’e iha ezame buat hotu bele fasil ba hau. Loroloron hau mai tuir aula,” nia afirma.
Estudante seluk, Cosme Guterres hatutan, estudante ida-idak presiza hakas an estuda tanba loron ezame besik ona.
“Tempu besik dadaun ona atu ami partisipa iha Ezame Nasional no Ezame Lokal. Nune’e, ami presiza hakas an estuda no kuidadu saúde atu labele moras. Ita-nia estudante ida-idak presiza esforsu an estuda. Ba hau, loroloron hau mai tuir aula,” dehan Cosme.
(jac)
