BAUCAU, STLTIMORLESTE.com – Komando Polísia Munisípiu Baucau sei halo investigasaun klean ba kazu tuda uma ne’ebé akontese iha Bairo Caisa’e, Suku Buruma, Postu Administrativu Baucau Vila, rezulta idozu Januário Freitas Belo kanek.
Asaun ne’e akontese iha loron 20 Setembru 2026, liu tuku 22:00, bainhira komvoi ida fila husi hakoi mate iha Suku Seiçal, Postu Administrativu Baucau Vila.
Tuir esplikasaun Xefe Bairo Caisa’e, Adolfo da Silva katak, komvoi ne’e akompaña husi Polísia Eskuadra Postu Baucau Vila. Bainhira to’o iha área eis-Prizaun Caisa’e, ema sira ne’ebé tama iha komvoi ne’e haklalak no uza gás motor, antes akontese asaun tuda uma tutuir dalan to’o iha área Marobo Caisa’e.
Asaun ne’e afeta idozu Januário Freitas Belo, ne’ebé sai ba liur atu soe fo’er ki’ik. Fatuk ida kona iha nia parte rentos, rezulta nia sofre kanek to’o desmaia.
Maibé, Komandante Komando Polísia Munisípiu Baucau, Superintendente Xefe João Sancho Pires, hateten katak Polísia la akompaña komvoi refere.
“Polísia la lori komvoi ida, Polísia la liu husi grupu A B. Maibé momentu ne’e dehan ema fila husi mate uma iha Seiçal, mak ema balu tuda ne’e, mak Polísia tun ba,” hateten João Sancho Pires ba jornalista sira iha Vila Nova, Baucau, Kuarta (23/09/2026).
Pires esplika, bainhira Polísia simu informasaun kona-ba asaun tuda uma no ema ida hetan kanek, ekipa Polísia ba kedas no to’o tereñu atu hakalma situasaun.
Maibé Polísia mesak la auguenta, nune’e husu apoiu ba unidade intelijénsia hafoin lori sai grupu komvoi refere husi fatin insidente.
Nia rekoñese katak, asaun refere rezulta idozu ida hetan kanek. Tanba ne’e, Polísia sei kontinua prosesu investigasaun liuhusi aprosimasaun no rekoilla informasaun atu asegura kazu ne’e bele prosesadu tuir dalan legál.
“Prosesu ne’e la’o hela, ita la taka matan. Ema hotu-hotu ne’ebé iha bele fó informasaun. Ita tenta Autoridade sira, Xefe Bairo ne’ebé hato’o ona iha média, mai presta deklarasaun. Junta hamutuk lori ba Ministériu Públiku,” Pires komenta.
Komandante Polísia Munisípiu Baucau mós hateten katak Xefe Bairo Caisa’e atu marka prezensa iha edifísiu Komando Polísia Munisípiu Baucau, hodi presta deklarasaun kona-ba faktus sira ne’ebé nia hatene, atu apoia prosesu investigasaun.
Pires enfatiza katak, kona-ba asaun ne’e, parte seguransa la liu husi grupu A ka B, maibé kumpri de’it papel seguransa nian.
Nune’e Komando Polísia Munisípiu Baucau, sei kontinua prosesu investigasaun ba kazu refere no rekoilla informasaun husi parte sira ne’ebé iha koñesimentu kona-ba insidente ne’e.
(tom)
