DILI, STLTIMORLESTE.com – Sekertariu Estadu Kooperativa (SEKoop) lansa website ba fasilita asesu informasaun kona-ba konferénsia kooperativa rejionál no ASEAN Cooperative Expo 2026.
Sekertariu Estadu Kooperativa, Arsenio Pereira hatete, website ne’e sei fasilita asesu informasaun ba partisipante no públiku kona-ba Dili Regional Cooperative Conference Ministerial Dialogue no ASEAN Cooperative Expo 2026.
Nia hatete, iha era dijital, organizasaun eventu internasionál presiza adapta teknolojia atu fasilita prosesu rejistu no fahe informasaun ba partisipante sira.
“Agora rejistu la presiza manual. Partisipante bele uza telemovel no internet, depois scan QR code deit atu asesu informasaun,” dehan Arsenio ba jornalista iha lansamentu website Sekoop, iha Acait, Kuarta-feira (23/09/2026).
Arsenio hatete, sistema dijital hanesan ne’e komún ona iha konferénsia internasionál iha rai seluk, maibé ba Sekoop, inisiativa ne’e sai hanesan pasu importante atu aplika teknolojia iha organizasaun eventu.
Nia esplika, rejistu manual dala ruma bele hamosu antrian naruk no halo partisipante hein oras ida ka rua. Ho sistema dijital, prosesu rejistu bele fasilita no reduz tempu hein.
Website ne’e mos sei ajuda Sekoop halibur dadus no prepara relatóriu kona-ba eventu. Ema ne’ebé la bele partisipa diretamente iha konferénsia bele asesu informasaun liuhusi plataforma cooptl.com.
Arsenio argumenta, preparasaun ba ASEAN Cooperative Expo 2026 atinji ona 90 porsentu. Ekipamentu no fatin expo agora hein prosesu instalasaun, tanba atividade sei halao iha 2 Outubru 2026, tuku 18:00.
Nia dehan, nasaun ASEAN balun konfirma ona partisipasaun, inklui Kambódia, Indonézia no Malásia, ho sira nia produtu atu partisipa iha expo.
Ba Indonézia, SEKoop konvida reprezentante husi Nusa Tenggara Timur (NTT) no MCC, inklui kooperativa sira, atu lori no fa’an sira nia produtu iha expozisaun.
Total produtu lokal 80 sei aprezenta iha expozisaun. Reprezentante husi munisípiu no federasaun kooperativa sei partisipa, ho ema nain lima husi kada munisípiu.
Diretor Tekniku Inovtec, Ricardo da Costa Ribeiro hatete, inisiativa SEKoop atu kria website ba eventu ne’e importante tanba permite públiku asesu informasaun kona-ba konferénsia no expo.
“Informasaun hotu kona-ba eventu ne’e sei sai iha website ne’e, ne’ebé ohin halo ona lansamentu,” dehan Ricardo.
Nia hatete, website ne’e bele asesu husi ema iha rai laran no rai liur. Maibé, komunidade balun sei hasoru limitasaun asesu internet, ne’ebé presiza solusaun husi governu no parte relevante sira.
Ricardo hatete, eventu ne’e importante no presiza asesu informasaun ne’ebé luan, tanba website bele sai meiu ida atu públiku hatene atividade ne’ebé Sekoop sei halao.
(dom)
