DILI, STLTIMORLESTE.com – Rekrutamentu membru FALINTIL-Forsa Defeza Timor-Leste (F-FDTL) sei akontese iha futuru, maibé la’ós iha 2026.
Xefe Estadu-Maior Jenerál F-FDTL, Tenente Jenerál Domingos Raul “Falur Rate Laek” hato’o klarifikasaun kona-ba planu rekrutamentu membru foun.
Nia hateten, rekrutamentu depende ba desizaun Governu, inklui aprovasaun no alokasaun orsamentu atu suporta prosesu rekrutamentu.
Falur hateten, F-FDTL presiza membru foun tanba númeru rekursu umanu seidauk sufisiente atu responde ba nesesidade institusionál.
“Tenki rekruta, tanba se la rekruta, siklu forsa ne’e sei funsiona oinsá?,” hatete Xefe Estadu-Maior Jenerál F-FDTL, Tenente Jenerál Domingos Raul “Falur Rate Laek”, ba STL iha Kuartel Jeneral F-FDTL Fatuhada Dili, Kuarta (23/09/2026).
Nia hato’o deklarasaun ne’e ba jornalista sira iha Kuartel Jenerál F-FDTL, Fatuhada, Dili, tersa-feira, 22 Setembru.
Falur klarifika katak, deklarasaun anterior kona-ba rekrutamentu membru foun la signifika katak prosesu sei hala’o iha 2026.
Nia hatete, tempu no kuantidade membru foun sei depende ba desizaun Governu no disponibilidade orsamentu Estadu.
“Bainhira no iha ne’ebé, ne’e desizaun Governu, tanba ligadu ho orsamentu ne’ebé aloka ba rekrutamentu,” nia esplika.
Falur mós refere ba debate kona-ba Proposta Orsamentu Jerál Estadu 2027, ne’ebé bele inklui alokasaun ba rekrutamentu.
“Depois iha debate orsamentu ne’e, imi mak bá akompana no haree alokasaun orsamentu,” nia informa.
Nia subliña katak, prosesu rekrutamentu tenke tuir planeamentu institusionál no disponibilidade orsamentu ne’ebé Governu aprova.
Deklarasaun ne’e hato’o hodi responde ba pergunta jornalista sira kona-ba planu rekrutamentu ne’ebé nia temi anteriormente iha UNTL.
Iha fatin hanesan, Akademista UNTL, José Costantino Ximenes informa, rekrutamentu ba F-FDTL tenke loke ho onestu atu nunee povu nia oan tenke esesu hotu ba rekrutamentu refere.
“Tinan-tinan ita haree rekrutamentu ba Membru foun F-FDTL nian sira haree liu ba Veteranus sira nian oan, maibe tenke mos hanoin ba povu ai-leba nia oan sira mos tenke konkore hotu,Ita haree rekrutamentu ba F-FDTL laiha probelma, so problema mak PNTL nian uza familiarizmu iha laran,” nia afirma.
(jen)
