ERMERA, STLTIMORLESTE.com – Autoridade lokal husi Suku Raimerhei, Postu Administrativu Ermera Vila, Munisípiu Ermera, preokupa kona-ba dezenvolvimentu no kondisaun dalan ba suku refere.
Tuir Xefe Suku Raimerhei, Abel de Jesus Soares, Suku Raimerhei iha aldeia neen, mak Aldeia Materestu, Loumo, Moris Foun, Timlele no Nazaré. Maibé, preokupasaun boot ne’ebé autoridade enfrenta mak kona-ba asesu dalan ba aldeia sira iha suku ne’e.
“Suku ne’e ita preokupa liu mak dezenvolvimentu dalan. Seidauk tama barak husi Estadu. Husi Vila Maria seidauk mai. Ida ne’e maka hanesan autoridade preokupadu, tanba suku seluk dezenvolvimentu ba, maibé suku ida ne’e iha istória, maibé dezenvolvimentu seidauk mai ba Suku Raimerhei,” dehan nia ba jornalista sira iha Aiceo, Kuarta-feira (23/09/2026).
Nia hatutan katak, estrada ne’e iha parte rua. Estrada ida husi Vila Maria, ne’ebé iha ligasaun ho istória rezisténsia, inklui movimentu lider Xanana Gusmão. Iha parte jeográfika, estrada ne’e liga husi Estadu mai ba aldeia Materestu.
Estrada seluk mai husi área Estadu no liga ba Suku Raimerhei, ne’ebé iha baliza ho Suku Koliati.
Abel de Jesus Soares hateten katak, hanesan autoridade lokal, nia preokupa tanba suku balu hetan ona dalan diak ne’ebé kareta bele tama, maibé Raimerhei sei enfrenta difikuldade. Tanba ne’e, nia deside sai Xefe Suku atu bele ko’alia no hato’o preokupasaun komunidade kona-ba asesu dalan.
Nia afirma katak, nia sempre hasoru malu ho lider Xanana Gusmão no ema barak mos konsidera Raimerhei hanesan suku istóriku. Tanba ne’e, nia husu atu autoridade kompetente fó atensaun ba dezenvolvimentu dalan.
“Ami sempre hasoru malu ho Maun Xanana, no ema barak konsidera suku ida ne’e hanesan suku istóriku. Tanba saida maka dalan seidauk diak? Suku seluk dalan tama ona, maibé iha Suku Raimerhei dalan seidauk diak,” dehan nia.
Nia esplika tan katak, kona-ba eletrisidade, iha Aldeia Materestu komunidade balu seidauk asesu. Maibé, besi rin instala ona, ne’ebé hatudu katak iha tempu badak eletrisidade bele tama ba komunidade.
Kona-ba bee mos, nia hateten katak komunidade iha asesu ba bee.
Nia afirma katak, durante tempu bailoro, kondisaun dalan iha aldeia sira bele diak, maibé bainhira tempu udan, asesu dalan husi Suku Estadu no Vila Maria sai difísil tanba kondisaun estrada la diak.
Situasaun ne’e mos afeta asesu komunidade ba Postu Administrativu Ermera Vila, ne’ebé distánsia konsidera dook, no ba sentru Munisípiu Ermera mos dook.
Xefe Suku Raimerhei hateten katak, dalan ba aldeia sira balu PNDS halo ona. Maibé, kona-ba estrada ne’ebé Governu planeia, nia hateten katak seidauk iha implementasaun iha terrenu.
Estrada husi Vila Maria mai iha ona parte ne’ebé planeadu, maibé autoridade lokal seidauk hatene kompanhia ne’ebé sei responsavel ba obra. Enkuantu estrada husi Estadu mai ba Raimerhei, nia hateten katak iha informasaun kona-ba kompanhia ida ne’ebé sei kaer obra.
Nia garante katak, autoridade lokal prontu atu simu no apoia kompanhia ne’ebé sei hala’o obra estrada iha área Suku nee.
Iha fatin ketak, komunidade Mario Martins hateten katak, hadi’a estrada sai nesesidade importante ba komunidade, tanba estrada ne’ebé la diak dificulta movimentu povu no atividade ekonómika.
“Ami la husu buat barak. Importante maka hadia dalan ne’e, atu fasilita ami lao ba mai hala’o atividade sira, tanba ami moris balu ho fa’an sasán,” dehan nia.
Nia hatutan katak, ohin loron iha fatin balu estrada hadi’a ona no uza asfalte. Tanba ne’e, komunidade husu Governu atu fó atensaun liután ba Suku Raimerhei, atu komunidade iha suku ne’e mos bele asesu estrada diak hanesan ho suku sira seluk.
(ter)
