DILI, STLTIMORLESTE.com – Servisu Edukasaun Munisípiu Aileu hala’o ona enkontru ho diretór no direjente eskola sira, atu ko’alia kona-ba preparasaun ba Ezame Nasionál no Ezame Lokál ne’ebé sei hala’o iha fulan Outubru 2026.
Diretora Servisu Edukasaun Munisípiu Aileu, Beatriz de Deus, hatete ba STL liuhusi telefone, Kinta-feira (24/09/2026), katak preparasaun eskola sira nian ba ezame rua ne’e lao hela, enkuantu atividade ensinu-aprendizajen kontinua hanesan baibain.
“Liga ba preparasaun eskola sira nian ba Ezame Nasionál no Ezame Lokál iha Munisípiu Aileu, dadaun ne’e lao hela. Kada loron atividade ensinu-aprendizajen iha eskola ida-idak lao hanesan baibain, hodi hein desizaun katak ezame sei hahú iha fulan Outubru,” dehan Beatriz.
Nia hatete, Servisu Edukasaun Munisípiu Aileu hala’o tiha ona enkontru ho direjente husi eskola ida-idak, maibé preparasaun sira sei kontinua tuir orientasaun no desizaun husi Ministériu Edukasaun.
“Ita nia preparasaun ba ezame lao hela. Prosesu ensinu-aprendizajen iha ita nia eskola sira lao di’ak hela. Ita hein de’it desizaun husi Ministériu Edukasaun kona-ba ezame rua refere,” nia informa.
Enkuantu, Superintendente Edukasaun Munisípiu Dili, Cesarina C. Guterres, hatete katak nia seidauk bele fó komentáriu kona-ba preparasaun eskola sira ba Ezame Nasionál no Ezame Lokál, tanba presiza hetan orientasaun kona-ba asuntu refere.
“Hakarak informa katak agora dadaun parte inspesaun iha IG foun ona, no ami hetan orientasaun katak presiza fó koñesimentu ba Inspesaun Jerál. Nune’e, labele fó komentáriu ba asuntu ida ne’e,” dehan Cesarina.
Iha parte seluk, Diretór Servisu Edukasaun Munisípiu Lautem, Aníbal Fernandes, hatete katak preparasaun eskola sira iha munisípiu ne’e ba Ezame Nasionál no Ezame Lokál lao hanesan baibain.
“Hau hanoin katak kona-ba Ezame Nasionál no Ezame Lokál, preparasaun eskola sira lao hanesan baibain, tanba estudante finalista sira sei tuir Ezame Nasionál no Lokál iha fulan Outubru tinan ne’e,” nia esplika.
(jac)
