DILI, STLTIMORLESTE.com – Eskola balun iha Munisípiu Aileu sei enfrenta falta meza no kadeira ba estudante sira, maski fasilidade balun hetan ona apoiu husi Ministériu Edukasaun.
Diretora Servisu Edukasaun Munisípiu Aileu, Beatriz de Deus, hatete ba STL liuhusi telefone, Kinta-feira (24/09/2026), katak eskola balun iha ona meza no kadeira, maibé balun sei menus hela.
“Kona-ba fasilidade hanesan meza no kadeira, ita nia eskola balun iha ona, tanba iha tinan kotuk mos ita hetan. Depois, ita sei mantein ho ida ne’ebé apoiu ona husi Ministériu ba ita nia eskola sira. Bainhira iha relatóriu ka buat ruma husi eskola mai, ita hato’o ba Ministériu,” dehan Beatriz.
Nia hatete, meza no kadeira ne’ebé menus iha eskola balun sei uza hela fasilidade tuan ne’ebé iha ona, no osan husi konsesaun eskolar bele uza atu hadia meza no kadeira ne’ebé aat.
Iha parte seluk, Diretór Servisu Edukasaun Munisípiu Liquiçá, Julio da Silva, hatete katak eskola balun iha munisípiu ne’e mos sei menus meza no kadeira ba estudante sira.
Nia hatete katak, nu’udar Diretór Edukasaun, nia kontinua halo pedidu ba Ministériu iha nivel nasionál, atu bele fó apoiu ba eskola sira ne’ebé presiza fasilidade.
“Ita nia eskola balun iha Munisípiu Liquiçá sei menus meza no kadeira ba estudante sira. Nu’udar Diretór Edukasaun, sempre halo pedidu ba parte nasionál hodi bele fó apoiu fasilidade meza no kadeira ba eskola sira,” nia informa.
Enkuantu, Diretór Servisu Edukasaun Munisípiu Ainaro, Patrício da Costa Magno, hatete katak eskola sira iha Ainaro enfrenta dezafiu kona-ba falta sala de aula, meza no kadeira.
Nia hatete katak, iha eskola 31 sei menus sala de aula, enkuantu eskola hamutuk 42, hahú husi nivel pré-eskolár to’o ensinu baziku, sei enfrenta falta meza no kadeira.
“Maske ita halo ona pedidu ba Ministériu Edukasaun iha nivel nasionál, maibé to’o agora seidauk hetan resposta kona-ba asuntu ida ne’e,” dehan Patrício.
Nia mos hatete katak, kona-ba kaderneta eskolar, kada tinan Servisu Edukasaun Munisípiu Ainaro halo pedidu ba Ministériu no hetan apoiu ba eskola sira. Livru ba estudante sira mos hetan apoiu tuir kurríkulu Ministériu Edukasaun.
Patrício esplika, falta meza no kadeira akontese tanba fasilidade tuan balun aat ona, nune’e presiza aumenta fasilidade foun atu apoia estudante sira iha prosesu ensinu-aprendizajen.
“Ita nia fasilidade hirak ne’e, eskola balun iha ona no balun sei menus. Restu iha hotu ona. Nune’e mos, kondisaun eskola balun presiza reabilitasaun no balun presiza konstrusaun foun, tanba edifísiu eskola balun presiza hadia,” nia esplika.
(jac)
