DILI, STLTIMORLESTE.com – FONGTIL realiza diskusaun mesa redonda kona-ba konseitu no definisaun sosiedade sivil iha Timor-Leste.
Diretór Ezekutivu FONGTIL, Inocencio de Jesus Xavier hatete, Fórum Organizasaun Naun Governamentál Timor-Leste (FONGTIL) organiza atividade ne’e atu diskute konseitu, definisaun, papel no kontribuisaun sosiedade sivil.
Nia dehan, Atividade ne’e hala’o iha Salaun Madre Canosa, Becora, Dili, ho partisipasaun membru ONG, CBO, grupu juventude feto, akademista no konfisaun relijioza.
Nia tenik,Partisipante sira inklui mós rede sektoral no movimentu sosial, hodi fahe esperiénsia, perspetiva no kontribuisaun ba dezenvolvimentu sosiedade iha Timor-Leste.
Nia subliña, importância konsultasaun nasional ba define valores no prinsipiu sosiedade sivil.
“Konsultasaun nasional tenke konsidera valores no prinsipiu ne’ebé orienta atuasaun instituisaun no sosiedade,”hatete Diretór Ezekutivu FONGTIL, Inocencio de Jesus Xavier ba jornalista sira iha Salaun Madre Canosa, Becora, Dili, Kinta (24/09/2026).
Nia hatete, prosesu konsultasaun tenke envolve parte relevante sira, inklui nível nasional no munisípiu, atu konsidera interese komunidade.
Nia mos husu atu dokumentu institusionál sira harmoniza malu, hodi evita kontradisaun no garante klaridade kona-ba baze legal.
“Dokumentu sira tenke harmoniza malu atu evita kontradisaun no garante baze legal ne’ebé klaru,”nia deklara.
Iha diskusaun ne’e, partisipante sira mós analiza definisaun sosiedade sivil tuir realidade no enquadramentu jurídiku Timor-Leste.
Nia informa, Diskusaun inklui organizasaun relijioza, kongregasaun, orden relijioza, fundasaun no asosiasaun, tuir Dekretu-Lei Nú. 5/2005.
Iha fatin hanesan, Koordenador GASC-VPM, Joaquim da Costa Freitas, esplika, Governu apoia iniciativa kona-ba edukasaun sivika no empoderamentu komunitáriu.
“Governu atribui orsamentu atu promove edukasaun sivika, empoderamentu komunitáriu no governasaun di’ak,” nia dehan.
Nia koalia, apoiu finanseiru Governu visa promove partisipasaun sidadaun, governasaun di’ak no dezenvolvimentu sosiedade sivil.
Nia afirma, diskusaun mós konsidera limitasaun orsamentu no nesesidade atu define área prioridade, kritériu avaliasaun no organizasaun ne’ebé bele asesu apoiu.
Tuir diskusaun, proposta hosi organizasaun sira bele liu 300 kada tinan, enkuantu rekursu finanseiru disponivel limitadu.
Konsultasaun mesa redonda sei envolve munisípiu no região sira, atu rona ideia, esperiénsia, kapasidade no kontribuisaun organizasaun sira.
Nia hatutan, rezultadu konsultasaun sira sei kompila iha relatóriu finál, ne’ebé bele sai baze ba diskusaun polítika Governu kona-ba sosiedade sivil.
FONGTIL konsidera sosiedade sivil nu’udar parseiru importante iha dezenvolvimentu, edukasaun, empoderamentu komunitáriu no harii nasaun.
Além diskusaun, FONGTIL mós iha programa formasaun kona-ba jestaun organizasaun, planeamentu estratéjiku no metodolojia servisu.
Nia afirma, atividade sira-ne’e objetivu atu fortalece kapasidade organizasaun no promove komprensaun kona-ba papel sosiedade sivil iha Timor-Leste.
Tuir informasaun apresentada, orsamentu anual FONGTIL ba atividade sira ne’e hamutuk US$ 20.000.
(jen)
