BAUCAU, STLTIMORLESTE.com – Projetu konstrusaun sala aula tolu (3) iha Eskola Ensinu Baziku Sentrál (EBC) Primeiru, Segundu no Terseiru Siklu Celestino Peloi Atelari, Postu Administrativu Laga, Munisípiu Baucau, provizoriamente paradu besik ona semana ida.
Diretór EBC Celestino Peloi Atelari, Jacarias de Sousa Gama, informa katak projetu ne’e responsabliza husi kompanhia lokal ida no atualmente kompleta ona etapa servisu dahuluk, inklui hada fundasaun no cór sinta dahuluk.
Maibé, tuir nia, servisu konstrusaun la kontinua tanba mixer betón kompanhia nian hetan avaria no sei iha prosesu hadi’a.
“Projetu ne’e husi Autoridade Munisípal atu konstrui sala tolu. Servisu la’o ona, maibé mixer kompanhia aat no agora sei hadia hela,” hateten Jacarias de Sousa Gama ba jornalista sira iha EBC Celestino Peloi Atelari, Kinta (24/09/2026).
Nia esplika katak projetu refere koloka husi Autoridade Munisípal Baucau iha EBC Celestino Peloi Atelari liuhusi Programa Dezenvolvimentu Integradu Munisípal (PDIM) 2026, ho númeru kontratu 32/KDM-BCU/VII/2026.
Projetu ne’e responsabliza husi kompanhia Celesdiybanu Unip. Lda., ho valór kontratu US$93,568.59. Servisu hahú iha 2 Jullu 2026 no tuir planu kontratu sei remata iha 31 Dezembru 2026.
Jacarias subliña katak tempu servisu restante menus ona, tanba ne’e husu atu parte relevante acelera prosesu konstrusaun.
“Projetu ida ne’e sei finaliza iha fulan Dezembru. Maibé besik ona udan, entaun ami husu atu acelera servisu ne’e,” nia rekomenda
Iha fatin servisu, badaen husi kompanhia kontratada, João Sambai, konfirma katak servisu iha projetu refere paradu temporariamente hafoin remata cór sinta dahuluk.
Nia hateten katak kompanhia prontu atu kontinua servisu, maibé sei hein ekipa tékniku PDIM Munisípiu Baucau atu mai terenu hodi halo verifikasaun no teste kualidade antes kontinua ba etapa tuir mai.
“Servisu ida ne’e atu kontinua, maibé sei hein tékniku PDIM Munisípiu mai haree no halo teste massa. Hafoin ne’e ami kontinua cór lantai-dasár,” hateten João Sambai
Nia esplika katak hafoin remata cór sinta dahuluk, etapa tuir mai tenke hala’o tuir dezenhu no espesifikasaun téknika. Tanba ne’e, kompanhia hein rezultadu teste no verifikasaun tékniku antes kontinua konstrusaun.
(tom)
