DÍLI, STLTIMORLESTE.com – Ministru Prezidénsia Konsellu Ministrus, Agio Pereira, hasoru Komisáriu Eleitorál Austrália, Jeff Pope diskute dezafiu teknolojia foun ne’ebé afeta prosesu demokrátiku no organizasaun eleisaun.
Enkontru ne’e halao iha Palasiu Governu no akompaña hosi Embaixadóra Austrália iha Timor-Leste, Caitlin Wilson, no aborda oportunidade atu hametin kooperasaun iha área eleisaun no prosesu demokrátiku.
Jeff Pope hato’o parabéns ba Timor-Leste kona-ba susesu iha realizasaun eleisaun sira no destaca partisipasaun aas husi sidadaun.
“Timor-Leste tenke sente orgullu ho rezultadu sira ne’ebé hetan ona,” hatete Jeff Pope liu husi nota komunikadu ofisial neebe STL asesu husi pajina facebook ofisial MPKM, Kinta (24/09/2026).
Jeff Pope konsidera esperiénsia demokrátika Timor-Leste nu’udar ezemplu ba nasaun sira seluk, liuliu nasaun ne’ebé liu husi konflitu.
Enkuantu Ministru Prezidensia Konsellu Ministru, Agio Pereira subliña importánsia preparasaun institusionál atu responde ba dezafiu ne’ebé mosu husi evolusaun teknolojia.
Desinformasaun, redes sosiál no inteligência artifisiál sai parte husi asuntu prinsipál sira ne’ebé diskute iha enkontru.
Parte rua analiza impaktu teknolojia no plataforma dijitál sira ba prosesu demokrátiku, inklui propagasaun lalais ba informasaun falsu ka manipuladu.
Sira mós diskute uza identidade falsu no inteligência artifisiál atu kria imajen, áudiu no vídeu ne’ebé bele aprezenta hanesan informasaun autêntika.
Aleinde ne’e, parte rua analiza monitorizasaun redes sosiál, verifikasaun informasaun no kapasidade institusionál atu responde lalais ba desinformasaun.
Kooperasaun mós foka ba edukasaun sivika no eleitorál, inklui literasia dijitál no mediátika, atu ajuda sidadaun avalia informasaun molok simu ka fahe.
Importánsia mídia komunikasaun sosial independente mós destaca, liuhusi papel sira nian atu fornese informasaun kredível kona-ba prosesu eleisaun.
Agio Pereira mós ko’alia kona-ba preparasaun Timor-Leste ba eleisaun munisipál iha futuru, inklui preparasaun institusionál no edukasaun sivika.
Partisipasaun polítika feto sai mós tema diskusaun, liuliu medida atu promove reprezentasaun feto iha vida públika.
Parte rua mós aborda ameasa, abuzu no atake reputasaun liuhusi plataforma dijitál ne’ebé bele afeta partisipasaun feto.
Vizita Jeff Pope ba Timor-Leste hala’o husi 21 to’o 24 Setembru, ho enkontru ho reprezentante instituisaun timoroan sira kona-ba organizasaun eleisaun.
Iha enkontru ne’e, reprezentante Gabinete Ministru Prezidénsia Konsellu Ministrus no Embaixada Austrália mós partisipa.
(alb)
