DILI, STLTIMORLESTE.com — FONGTIL husu Komisaun Anti Korupsaun (KAK) hapara Paulo Alexandre Gomes husi kargu asesor internasionál, tanba alegasaun krime iha Portugal.
Diretór Ezekutivu FONGTIL, Inocencio de Jesus Xavier hatete, organizasaun respeita prezunsaun inosénsia ba Paulo Alexandre Gomes.
Nia dehan, se alegasaun krime ne’e prova, nia konsidera la apropriadu atu servisu iha área kombate korrupsaun.
“Integridade KAK nian ami kestiona, tanba asesor simu osan boot iha Timor-Leste,”hatete Diretór Ezekutivu FONGTIL, Inocencio de Jesus Xavier ba jornalista sira iha Salaun Madre Canosa, Becora, Dili, Kinta (24/09/2026).
FONGTIL husu KAK atu halo averiguasaun kompletu kona-ba dadus no background asesor internacional refere.
Organizasaun ne’e mos husu KAK atu konsidera hapara imediatamente Paulo Gomes husi kargu asesor.
Nia afirma katak, asesor refere durante servisu la ajuda KAK jere responsabilidade ho efetividade.
Nia husu KAK atu komunikasaun ho autoridade Portugal kona-ba alegasaun sira ne’ebé envolve asesor refere.
Tuir FONGTIL, investigasaun iha Portugal bele fó impaktu ba kredibilidade no integridade instituisaun Timor-Leste.
Antes, Komisáriu KAK, Rui Pereira dos Santos rejeita fó komentáriu kona-ba asesor internacional Paulo Alexandre Gomes.
Paulo Gomes alegadamente enfrenta akuzasaun falsifikasaun dokumentu no koasaun iha kazu doping siklismu iha Portugal.
Nunee mos Akademista UNTL José Costantino Ximenes esplika konaba kazu krime iha Portugal, nee despasu akizasaun husi Ministériu Públiku Porto, 27 Fevereiru 2025, sita husi CNN Portugal.
Nia informa, Krime ne’ebé alega ko-autoria iha falsifikasaun dokumentu no koasaun, iha ámbitu kazu doping siklismu, nee KAK tenke foti esizaun hodi hapara Paulo Alexandre Gomes husi kargu asesor internacional.
(jen)
