DILI, STLTIMORLESTE.com — Ministru Petróleu no Rekursu Minerais (MPRM) asina kontratu daruak ho Fugro Singapore Marine Pte Ltd ba investigasaun geotekniku rota pipeline Greater Sunrise.
Ministru Petróleu no Rekursu Minerais, Francisco da Costa Monteiro hato’o informasaun ne’e iha Gabinete MPRM Farol, Kinta (24/09/2026).
“Ohin ita asina akordu entre MPRM ho Fugro kona-ba kontratu daruak ba servisu survei geotekniku,” dehan Francisco da Costa Monteiro.
Servisu Heavy Geotechnical Investigation sei uza ro ahi no ekipamentu espesializadu atu foti sampel rai iha tasi okos.
Investigasaun sei hala’o liuliu iha rota pipeline Greater Sunrise mai Timor-Leste, inklui área Natarbora.
Ministru hatete, servisu ne’e importante tanba presiza teknolojia no ekipamentu espesializadu atu hala’o investigasaun iha tasi kle’an.
Fugro hetan kontratu liu husi prosesu konkursu no avaliasaun, ho objetivu atu hili empreza ne’ebé iha kapasidade téknika.
MPRM antes ne’e asina ona kontratu dahuluk ho Fugro kona-ba servisu Geofizika, ne’ebé sei prepara faze dezenvolvimentu tuir mai.
Ba servisu geotekniku, Fugro sei hala’o profurasaun no foti sampel rai iha tasi, liuliu iha rota pipeline Greater Sunrise.
Francisco hatete, servisu Geotechnical sei hahú iha inísiu 2027, enkuantu servisu Geofizika sei hahú iha fulan oin.
Regional Business Line Director Marine Site Characterization APAC Fugro, Safri Drahman, hatete sira sente onra tanba konfiansa ne’ebé MPRM fó ba Fugro.
“Kontratu ne’ebé asina ohin mak kontratu daruak ba servisu Geotechnical,” dehan Safri Drahman.
Fugro sei uza teknolojia foun atu hala’o investigasaun geotekniku iha tasi kle’an, ne’ebé bele to’o 3.000 metru.
Servisu sei kobre rota pipeline rua, mak Bayu-Undan no Greater Sunrise, atu rekolla dadus ba dezenvolvimentu projetu.
Projetu Geofizikal sei hahú iha Novembru 2026, depois servisu Geotechnical sei kontinua iha Fevereiru 2027.
Akizisaun dadus iha kampu tomak sei lori besik tinan ida atu kompleta, tuir planeamentu projetu.
Safri garante katak servisu sei hala’o ho profisional, seguru no tuir padraun nesesáriu, inklui konsiderasaun ba protesaun ambiente.
(joa)
