ERMERA, STLTIMORLESTE.com — Provedor Direitus Umanus no Justisa (PDHJ) husu funsionáriu públiku atu fó atendimentu profisionál, justu no efetivu.
Semináriu ho tema “Atendimentu Servisu Públiku ho Profisionalizmu, Justu no Efetivu” realiza iha Munisípiu Ermera, Kinta-feira, 24 Setembru 2026.
Provedor Direitus Umanus no Justisa, Virgílio da Silva Guterres dehan, administrasaun públika tenke prioriza atendimentu povu no respeita direitus umanus.
“Administrasaun públika tenke servi povu ho atendimentu profisionál, justu, efetivu no responsivu, hodi promove direitus umanus no ukun-di’ak,” dehan Virgílio.
Nia hateten katak, direitus umanus mosu iha situasaun simples ne’ebé sidadaun sira hasoru durante asesu ba servisu públiku.
Tuir nia, ema isin-rua, ema ho defisiénsia, ferik no katuas presiza simu prioridade no tratamentu ho respeitu durante atendimentu.
“Administrasaun públika no servisu públiku la’ós kestaun administrativa de’it, maibé kestaun respeitu ba direitus umanus,” dehan nia.
Virgílio sublinha, administrasaun públika iha obrigasaun atu respeita, proteje no promove direitus umanus iha prestasaun servisu.
Nia mós hateten katak, Ermera hili nu’udar fatin komemorasaun tanba munisípiu ne’e iha istória importante iha luta ba independénsia.
Tuir nia, espíritu luta no solidariedade komunidade iha tempu pasadu tenke sai inspirasaun ba administrasaun atu garante servisu públiku to’o komunidade.
Nia argumenta, desentralizasaun la’ós fahe tarefa de’it, maibé presiza inklui desentralizasaun finanseira ba munisípiu sira.
“Ita tenke desentraliza tarefa no mós finansas, hodi fó rekursu sufisiente ba munisípiu sira atu rezolve problema povu,” dehan Virgílio.
Prezidente Autoridade Munisipál Ermera, José Martinho dos Santos Soares, konsidera atendimentu públiku nu’udar parte importante ba garantia sidadaun sira-nia direitu.
“Tema semináriu ne’e importante tebes, tanba atendimentu profisionál, justu no efetivu garante direitu sidadaun no hametin konfiansa,” dehan José Martinho.
Nia dehan funsionáriu públiku ida-idak tenke komprende katak kargu públiku la’ós priviléjiu, maibé responsabilidade atu servi povu.
Tuir nia, funsionáriu tenke atende ema hotu ho respeitu, la halo diskriminasaun no fó solusaun tuir lei no prosedimentu.
“Governação di’ak hahú husi maneira ita simu sidadaun, rona preokupasaun no responde ba nesesidade sira,” sublinha José Martinho.
Nia enkoraja partisipante sira atu uza semináriu hodi fahe esperiénsia, identifika dezafiu no formula rekomendasaun prátika.
José Martinho husu atu rezultadu semináriu transforma sai mudansa konkreta iha fatin servisu, la’ós remata de’it iha salaun.
Ba formandu sira, nia husu atu partisipa ho seriedade, disiplina, responsabilidade no atensaun durante atividade aprendizajen.
“Formandu ida-idak tenke sai ajente mudansa iha unidade servisu, liuhusi aplikasaun aprendizajen iha atendimentu loroloron,” dehan nia.
Nia hateten, funsionáriu tenke ko’alia ho lian di’ak, fó informasaun loos, evita atrasu no proteje dadus sidadaun.
Tuir nia, mudansa ki’ik husi kada funsionáriu bele produz impaktu boot ba konfiansa povu nian ba instituisaun Estadu.
Ba dirijente no xefe sira, nia husu atu kria ambiente servisu ne’ebé favorese profisionalizmu, fó orientasaun klaru no akompaña dezempeñu.
Nia mós husu instituisaun sira atu integra rekomendasaun semináriu iha planu asaun, supervizaun no avaliasaun servisu.
José Martinho enkoraja organizadór, oradór no fasilitadór sira atu dokumenta rezultadu semináriu no define responsabilidade ba akompañamentu.
“Ita presiza medida konkreta no prazu realista, atu koñesimentu ne’ebé fahe ohin transforma sai melloria ne’ebé sidadaun sente,” dehan nia.
Autoridade Munisipál Ermera reafirma kompromisu atu hadi’a atendimentu públiku, hametin responsabilidade institusionál no promove kultura servisu.
Nia mós agradese ba komisaun organizadora, oradór, fasilitadór no partisipante sira ba kontribuisaun iha semináriu.
“Servi ho profisionalizmu mak respeita povu. Servi ho justisa mak dignifika ema,” dehan José Martinho.
(ter)
