DILI, STLTIMORLESTE.com — Sentru Excelénsia sei dezenvolve atu hasa’e kapasidade rekursu umanu Timor-Leste (TL) liuhusi treinamentu profisionál, liuliu ba setor petrolíferu, rekursu mineral no indústria.
Prezidente no CEO TimorGAP, Rui Soares, dehan ba STL iha Timor Plaza, Kinta (24/09/2026), katak TimorGAP, E.P. no Cegelec Oil & Gas asina akordu servisu hamutuk kona-ba apoiu tékniku no treinamentu ba dezenvolvimentu no konstrusaun Suai Centre of Excellence, ne’ebé foka ba área Oil & Gas, siénsia no teknolojia.
Nia esplika katak, projetu ne’e sei inklui dezenvolvimentu supply base no infraestrutura apoiu lojístika ba atividade indústria iha futuru, liuliu iha Costa Sul.
“Objetivu prinsipál projetu ne’e mak prepara juventude no profisionál Timor-Leste atu responde ba nesesidade rekursu umanu iha projetu dezenvolvimentu indústria iha tinan sira oin mai,” dehan Rui Soares.
Nia haktuir katak, programa treinamentu sei fó atensaun ba setor petrolíferu, rekursu mineral, indústria no kompeténsia téknika espesializada.
Tuir Rui Soares, iha futuru projetu dezenvolvimentu ne’e bele envolve planta enerjia, refinaria no indústria petroquímika, tuir nesesidade no planu dezenvolvimentu setor relevante sira.
Nia afirma, parseiru internasionál ne’ebé envolve iha projetu ne’e iha esperiénsia iha França no área indústria relevante sira. Esperiénsia ne’e sei kontribui ba preparasaun profisionál Timor-Leste, liuliu iha setor petrolíferu, minerais no área téknika espesializada.
Nia mós hateten katak, kompanhia ne’e iha ona presensa iha Timor-Leste durante tinan ida no envolve hamutuk iha projetu no atividade treinamentu atu hasa’e kapasidade rekursu umanu.
Cegelec apoia dezenvolvimentu kapasidade
Chairman Cegelec Oil & Gas, Didier Elie, dehan kompanhia husi França ne’ebé iha esperiénsia iha África kontente atu apoia TimorGAP iha dezenvolvimentu atividade iha Timor-Leste.
“Ami nu’udar kompania husi França, ne’ebé iha esperiénsia iha África, kontente tebes atu mai apoia TimorGAP iha nia dezenvolvimentu no atividade iha Timor-Leste. Ami iha ona iha Timor-Leste durante tempu naruk, no projetu ida-ne’e sai oportunidade boot atu fila mai ho atividade foun, hodi apoia TimorGAP iha konstrusaun ne’e,” dehan Didier Elie.
Nia hateten, inísiu projetu ne’e sei sai oportunidade ba Cegelec atu envolve fali iha atividade foun no apoia dezenvolvimentu Timor-Leste.
Enkuantu Manajer Negósiu ba Oil & Gas Competence Assurance Training, Benoit Rabaud, dehan prosesu projetu sei kontinua tuir etapa sira ne’ebé planeadu.
“Etapa tuirmai, ami sei kontinua ho prosesu ne’e. Ba ami, ida-ne’e importante tebes no ami sei buka resposta ba nesesidade sira ne’ebé iha,” dehan Benoit Rabaud.
Asinatura no troka prezente
Tuir observasaun STL, atividade ne’e hala’o iha Edifísiu TimorGAP, Timor Plaza, Díli.
Hafoin serimónia asinatura, reprezentante Cegelec Oil & Gas entrega prezente ba Prezidente no CEO TimorGAP. Iha sorin seluk, TimorGAP mós oferese prezente tradisionál Timor-Leste ba reprezentante kompanhia França nian.
(jos)
