DILI, STLTIMORLESTE.com — Eis Deputadu PD, Virgilio Hornai husu Governu kria dekretu-lei hodi legaliza diploma estudante Timor-oan sira iha diáspora.
Virgilio Hornai, eis Membru Konsellu Estadu dehan, estudante Timor-oan ne’ebé estuda iha estranjeiru hasoru difikuldade atu kontinua edukasaun.
Nia hateten, estudante sira, liu-liu ne’ebé remata ensinu primáriu no sekundáriu iha Portugal, hetan deit sertifikadu rekoñesimentu husi eskola.
“Sertifikadu ne’e labele uza iha nasaun fora Europa, nune’e estudante sira susar kontinua estudu iha ASEAN no Australia,” dehan Virgilio Hornai.
Nia ko’alia ba STL iha Dili, Sesta-feira (25/09/2026), no husu Governu, liu-liu Ministériu Edukasaun, atu fó atensaun ba problema ne’e.
“Selae Timor-oan ne’ebé estuda iha liur molok terseiru anu tenke muda fali sira nia estudu mai Timor-Leste atu hetan diploma,” nia sublinha.
Hornai husu Governu atu kria mekanizmu legal hodi fasilita legalizasaun diploma estudante sekundáriu Timor-oan ne’ebé estuda iha diáspora.
Nunee mos observador polítiku Antonio Magno konsidera preokupasaun ne’e pertinente no hatudu nesesidade politika edukasaun ne’ebé konekta ho realidade diáspora.
“Governu tenke kria dekretu-lei hodi legaliza diploma estudante diáspora, tanba sira mós Timor-oan,” dehan Antonio Magno.
Nia hateten, sertifikadu rekoñesimentu ne’ebé la vale iha ASEAN no Australia bele limita oportunidade edukasaun estudante Timor-oan iha nasaun sira ne’e.
“Se ita husik deit ho sertifikadu ne’ebé la vale iha ASEAN no Australia, ita taka dalan ba sira nia futuru,” nia sublinha.
Akademista UNTL Mariano Soares mós reforsa katak, problema legalizasaun diploma bele afeta mobilidade akademiku estudante Timor-oan.
“Diploma ne’e xave ba asesu universidade. Governu tenke halo ekivalensia diploma no kria dekretu-lei ne’e urjente,” Mariano hateten.
Nia konsidera estudante sira bele enfrenta gastu boot se tenke fila mai Timor-Leste atu hetan diploma ne’ebé bele uza ba kontinuidade estudu.
(car)
