FATUBESI, STLTIMORLESTE.com – Família boot STL ne’ebé lidera husi CEO halo peregrina ba Na’in Feto Fatubessi hodi hato’o agradese ba Na’in Feto ba Grasa ne’ebé haraik ona ba STL, no agradese ba Prezidente Repúblika José Ramos-Horta ne’ebé rona sira nia halerik tulun media 4 inklui STL.
Iha dadeer ida, antes Dili komesa nakonu ho movimentu, família boot Suara Timor Lorosa’e (STL) sai husi fatin ho pasu ida ne’ebé nakonu ho esperansa. Peregrina ne’e Lideradu husi CEO STL, Salvador Januario Soares, no funsionáriu membru família STL peregrina ba Fatubessi, lori ho sira orasaun agradesementu ba Grasa ne’ebé sira hetan, gratidaun no esperansa.
Tuku 8 dadeer, sira hahú viajen husi Dili. Destinu la’ós de’it fatin ida atu vizita, maibé fatin sagrada ida ne’ebé sira hakarak hato’o sira nia fuan ba Maromak no Na’in Feto.
Depois oras tolu iha dalan, família STL to’o Santoriu Fatubessi tuku 11 dadeer. Iha oin santoriu, pasu sira nian komesa hakmatek, no lian konversa sira muda sai lian orasaun.
Iha fatin ne’ebé hakerek “Timor Terra da Santa Maria”, família STL halibur hamutuk. Iha sorin-sorin, ai-funan kor oioin haketak atmosfera santoriu nian, enkuanto iha laran sira prepara an atu tama ba momentu meditasaun no orasaun.
Peregrinasaun ne’e mai husi esperiénsia ida ne’ebé la fasil. STL, hanesan instituisaun media, liu ona husi tempu difísil, inklui krize polítika no impaktu pandemia COVID-19 ne’ebé afeta rendimentu no servisu instituisaun.
Maibé, iha tempu susar, família STL hili atu la’o hamutuk no fiar katak iha dalan ida sei lakan nafatin.
CEO STL, Salvador Januario Soares, hateten katak objetivu prinsipál husi peregrinasaun ne’e atu hato’o agradese ba Maromak no Na’in Feto ba grasa no tulun ne’ebé sira simu durante tempu difísil.
“Intensaun husi peregrinasaun ida ne’e atu hato’o agradese ba Maromak no ba Na’in Feto, tanba durante tempu difísil ami hasoru laloran boot. Família boot hamutuk halo orasaun, no Maromak rona. Na’in Feto mos rona no ikus mai ami hetan tulun,” no agradese ba Prezidente Repúblika José Ramos Horta ne’ebé ajuda ona sira. hateten Salvador.
Iha orasaun sira mós harohan atu Na’in Feto haraik Grasa vida naruk ba Prezidente Repúblika Ramos Horta nune’e fuan nakonu ho domin tulun povu kiik sira.
Prezidente Repúblika mós hanesan aman ida ne’ebé nakonu ho domin rona sira nia halerik hotu nune’e ajuda sira iha tempu susar, buat sira ne’e hotu tanba Grasa husi Maromak.
Tanba ne’e, iha orasaun iha Fatubessi, família STL la haluha husu bensaun ba Prezidente Repúblika atu nafatin hetan saúde di’ak, forsa no fuan nakonu ho domin atu kontinua tulun povu, liuliu povu ki’ik sira.
Senior Manager no Diretor Business STL, Florêncio de Oliveira, hateten katak peregrinasaun ne’e sai hanesan momentu atu família STL hamutuk hato’o gratidaun ba Na’in Feto.
“Ohin ekipa STL ne’ebé lideradu husi CEO STL halo peregrinasaun mai Fatubessi. Ami sai husi Dili tuku 8 dadeer ho objetivu atu agradese ba Na’in Feto, tanba ho grasa Maromak leten aas, ami bele hasoru dezafiu sira ne’ebé STL enfrenta durante krize polítika to’o mai COVID-19,” hateten Florêncio.
Nia hatutan katak iha tempu difísil ne’e, STL enfrenta impaktu ba rendimentu no ameasa ba kontinuidade servisu. Maibé, apoiu husi ema sira no Prezidente Repúblika ajuda STL atu kontinua hametin nia servisu media.
Depois remata meditasaun, família STL kontinua ho reza tersu. Iha silénsiu Kapela Fatubessi, liafuan orasaun nian sai hanesan ponte entre esperiénsia tempu liuba no esperansa ba tempu oin mai.
Sira reza ba Na’in Feto atu kontinua akompaña STL, atu instituisaun ne’e bele lao ba oin no nafatin servi povu liu husi jornalizmu ne’ebé haklaken lia loos.
Peregrinasaun ne’e hala’o iha sexta-feira, 25 Setembru 2026. Maibé, ba família STL, dalan ne’e la remata bainhira sira sai husi Fatubessi.
Sira fila fali ba Dili ho fuan ne’ebé hakmatek, lori ho sira memória ida kona-ba orasaun, gratidaun no esperansa.
Iha Fatubessi, família boot STL la’ós de’it husu grasa. Sira mos aprende atu agradese — ba Maromak, ba Na’in Feto, no ba ema sira ne’ebé iha tempu difísil nafatin hamriik besik no fó esperansa atu kontinua la’o.
(eme)
