DILI, STLTIMORLESTE.com — Total fatin negosiante 114 iha Merkadu Taibesi hetan estragus total tanba insendiu, Sesta kalan, 25/09/2026.
Xefi Jestor Merkadu Taibesi, Anibal de Jesus, hateten ba STL, Domingu (27/09/2026), katak sasan barak la konsege salva hosi ahi.
Nia hateten katak, ahi mosu tanba konsletu hosi fiu eletrisidade iha besi-rin leten. Fiu ne’e todan no monu ba kios ida.
Ahi ne’e hahú sunu kios ida, depois espalla ba fatin negosiante sira seluk iha merkadu.
Negosiante sira fa’an sasan oioin, inklui telefone, roupa no sasan kios nian. Tanba ahi lakan maka’as, sasan barak la konsege salva.
Depois insendiu, jestaun merkadu hamutuk ho autoridade nasional halo rejistu ba sasan no fatin ne’ebé hetan estragus.
Anibal de Jesus hateten katak, dadus kona-ba estragus hotu rekolla ona no hato’o ba superior sira atu halo avaliasaun.
Nia hatutan katak, balu hosi negosiante sira tau sasan de’it iha merkadu. Maibé, maioria hela no toba iha fatin negosiu.
Tanba insendiu, sira nia fatin hela mos hetan estragus, nune’e sira labele kontinua hala’o atividade negosiu.
Iha akontesimentu ne’e, ema na’in tolu ne’ebé haree ahi no halai sai hetan kanek tanba besi kona sira.
Ekipa saúde kontaktu kedas no lori ema na’in tolu ba ospitál. Tuir informasaun, sira hetan kanek kaman no la grave.
Anibal de Jesus rekomenda ba parte relevante sira atu tau atensaun ba situasaun negosiante sira ne’ebé hela iha merkadu.
Nia hateten katak, negosiante barak hela iha merkadu durante tempu ne’e. Insendiu estraga sira nia fatin hela no negosiu.
Negosiante Siquito de Oliveira Mendonsa dehan katak ahi han hotu nia fatin fa’an sasan iha Merkadu Taibesi.
“Hau nia fatin ahi han hotu. Sasan ne’ebé hau fa’an maka pasta, sapatu, buli no rice cooker.”
Nia hateten katak, bainhira insendiu akontese, nia la iha merkadu tanba ba tiha halo uma lisan iha foho.
Tanba nia la iha fatin, nia kios taka hela bainhira ahi hahú no espalla ba fatin negosiante sira seluk.
Nunee mos, Siquito de Oliveira Mendonsa hateten katak, Jestaun Merkadu Taibesi halo ona rejistu kona-ba sasan no estragus ne’ebé nia hetan.
Nia konsidera katak, se Estadu fó ajuda ba negosiante sira afetadu, apoiu ne’e bele ajuda sira hahú fali atividade negosiu.
Maibé, nia hateten katak, Estadu labele obriga atu fó ajuda, tanba insendiu ne’e akontese derepente no la previstu.
Insendiu ne’e akontese iha Sexta-feira kalan, 25/09/2026, aproximadamente oras 22:00.
(ter)
