DILI, STLTIMORLESTE.com – Departamentu Bombeirus, Autoridade Protesaun Sivil, Domingu (27/09/2026) dader halo intervensaun hodi hamate inséndiu ne’ebé akontese iha Merkadu Comoro, Dili, no sunu sasan negósiu vendedores balun, inklui roupa, foos, makina suku roupa, sasan seluk no taxi ida.
Segundu Komandante Bombeirus, Nordin da Silva Mendonça, hateten ba STL iha fatin akontesementu katak, Bombeirus simu informasaun kona-ba inséndiu ne’e liuhusi telefone no mobiliza kedas ekipamentu no ekipa atu halo intervensaun.
Nia hateten katak ekipa Bombeirus hasoru dezafiu bainhira tama ba merkadu tanba tráfiku maka’as no área intervensaun ne’ebé estreitu. Maski nune’e, ekipa Bombeirus konsege kontrola ahi no salva sasan negósiu balun.
“Ohin ami simu informasaun maizumenus tuku 9 ho balun husi vendedores sira iha Merkadu Comoro. Ami hasoru dezafiu tanba kareta maka’as bainhira tama ba merkadu, maibé konsege halo intervensaun hodi salva maluk negósiantes balun sira nia sasan iha merkadu laran,” dehan Nordin da Silva Mendonça.
Enkuantu ne’e, Urbano Dias Marçal, vendedor iha Merkadu Comoro ne’ebé sai vítima husi inséndiu ne’e, hateten katak ahi hahú mosu husi parte leten husi fatin negósiu, maibé nia seidauk hatene motivu ka kauza loos husi inséndiu.
Nia hateten katak ahi derepente lakan maka’as no akompaña ho anin, nune’e nia ho nia oan halai sai husi fatin negósiu. Urbano konsege salva osan ne’ebé antes tau ona iha pasta, maibé osan ne’ebé iha gaveta laran no sasan negósiu seluk la konsege hasai.
“Akontesimentu inséndiu ne’e husi parte leten, maibé hau la hatene motivu ahi han fatin ne’e tanba saida. Derepente ahi lakan sae maka’as ona, entaun hau ho hau nia oan halai sai husi ami nia fatin. Tanba ahi lakan maka’as, la konsege salva hau nia sasan, inklui taxi ida ne’ebé ahi han hotu,” dehan Urbano.
Vendedora seluk, Ercilia Ximenes, hateten katak nia sente hakfodak bainhira simu informasaun kona-ba inséndiu ne’e, tanba iha momentu akontesementu nia sei iha uma.
Nia dehan katak kolega sira telefone informa kona-ba inséndiu iha Merkadu Comoro, nune’e nia kedas halai ba merkadu atu haree nia fatin negósiu. Maibé, bainhira to’o iha fatin, nia hetan sasan negósiu barak ne’ebé ahi sunu ona.
“Hau nia kolega sira telefone mai dehan inséndiu akontese iha Merkadu Comoro. Entaun hau halai mai haree hau nia sasan iha merkadu laran, maibé ahi han hotu ona. Sasan iha fatin negósiu, hanesan almari, makina suku roupa no sasan nesesidade ne’ebé uza ba negósiu, ahi han hotu ona,” dehan Ercilia ho triste.
Ercilia hateten katak inséndiu ne’e akontese maizumenus tuku 09:00 dadeer, bainhira nia no vendedores seluk sei iha uma.
Nia mos hateten katak nia hahú fa’an roupa iha fatin negósiu ne’e desde tinan 1999, maibé agora lakon sasan negósiu hotu tanba inséndiu.
Tuir observasaun STL iha terenu, inséndiu ne’e akontese iha área Merkadu Comoro, no intervensaun husi Bombeirus ajuda kontrola ahi no salva sasan negósiu balun husi vendedores sira.
Kauza no totál prejuízu husi inséndiu ne’e seidauk hetan informasaun ofisiál.
(jos)
