DILI, STLTIMORLESTE.com — Prezidente Republika, José Ramos Horta, partisipa iha Sesaun Anual Assembleia Jerál Organizasaun Nasoins Unidas (ONU), no hala’o enkontru bilateral ho lideransa internasionál no autoridade sira iha Estadus Unidus.
Informasaun ne’e hato’o hosi PR José Ramos Horta hafoin nia fila mai Timor-Leste, liuhosi Aeroportu Internasionál Nicolau Lobato, Comoro, Dili, Domingu (27/09/2026), hafoin hala’o vizita diplomátika ba Nova York no Washington.
Durante vizita, delegasaun Timor-Leste partisipa iha enkontru ho Sekretáriu-Jerál ONU, prezidente, ministru no embaixadór husi nasaun sira ne’ebé partisipa iha Assembleia Jerál ONU.
Alende programa ofisiál iha ONU, PR Horta mos partisipa iha eventu paralelu no hala’o enkontru ho lideransa polítika no instituisaun sira iha Estadus Unidus, inklui enkontru ho ex-Prezidente Estadus Unidus, Barack Obama.
“Hau nia vizita ba Washington, delegasaun halo enkontru ho reprezentante Departamentu Estadu Amerikanu no mos ho instituisaun sira hanesan Federal Bureau of Investigation (FBI) no Central Intelligence Agency (CIA),” dehan PR Horta.
Nia hatete katak enkontru sira-ne’e aborda esforsu atu hametin relasaun no kooperasaun institusionál entre Timor-Leste no Estadus Unidus, inklui iha área seguransa no diplomásia.
Seguransa no intelijénsia sai asuntu diskusaun
Asuntu seguransa, intelijénsia, ciberseguransa no relasaun diplomátika sai parte husi diskusaun durante vizita delegasaun Timor-Leste ba Washington.
PR Horta hatete katak iha diskusaun sira-ne’e, sira aborda mos situasaun seguransa global no rejionál, inklui dezenvolvimentu iha área intelijénsia no seguransa sibernétika.
Tuir nia, asuntu sira-ne’e presiza haree ho kuidadu tanba bele iha impaktu ba estabilidade no relasaun entre Estadu sira.
Nia subliña katak konsultasaun no akordu entre parte sira importante, liuliu bainhira asuntu envolve interese estratéjiku no seguransa Estadu.
“Kooperasaun no komunikasaun klaru” konsidera importante atu evita interpretasaun sala no hamenus risku konflitu, tuir PR Horta.
Nia mos refere ba kontaktu ho autoridade sira iha Departamentu Estadu Amerikanu, inklui Assistant Secretary of State, ne’ebé, tuir nia, sai parte husi esforsu diplomátiku atu komprende pozisaun no prioridade husi parte sira kona-ba seguransa no relasaun internasionál.
Vizita ne’e inklui programa iha Nova York no Washington antes delegasaun Timor-Leste fila mai Timor-Leste.
(jos)
