DÍLI, STLTIMORLESTE.com — Problema interna iha federasaun boxing afeta partisipasaun Timor-Leste iha Asia Games 2026, iha Aichi-Nagoya, Japaun.
Ministru Juventude, Desportu, Arte no Kultura (MJDAK), Nélio Isac Sarmento hateten, problema interna federasaun bele limita oportunidade atleta sira reprezenta Timor-Leste iha kompetisaun internasionál.
“Boxing la ba kompetisaun iha Japaun, tanba problema iha federasaun boxing laran. Sira ejiji malu no iha kompetisaun ne’ebé la fer,” hateten Nélio ba jornalista STL iha Ginásiu Dili, Sesta-feira (25/09/2026).
Nia hateten, membru federasaun antes lamenta kona-ba nesesidade atu realiza assemblea geral. Tanba situasaun ne’e, nia husu membru sira rezolve diferensa no realiza assemblea.
“Husu atu sira book-an atu realiza assemblea, tanba ita hanoin katak sei hanesan ne’e bebeik. Atleta ida atu reprezenta mos bele hasoru problema ba oin,” nia dehan.
Além problema interna, Nélio temi mos kona-ba relasaun no prosesu Timor-Leste ho organizasaun boxing internasionál, ne’ebé tuir nia seidauk remata ho diak.
“Haree mos sira nia adezaun ba organizasaun boxing internasionál ne’ebé seidauk iha prosesu. Ho ida ne’e hotu, ASEAN Games ita labele partisipa,” nia afirma.
Nia konsidera situasaun organizasaun bele afeta prestasaun atleta boxing Timor-Leste iha kompetisaun rejionál, inklui SEA Games iha Tailândia.
“Iha kompetisaun SEA Games iha Tailândia mos sira hetan prestasaun ladún diak no so ida deit,” nia dehan.
Tanba ne’e, Nélio husu organizasaun boxing amadora Timor-Leste hadi’a sistema organizasaun no prepara atleta sira ho diak liután.
Objetivu mak atu atleta boxing Timor-Leste bele prepara ho kondisaun diak no partisipa iha SEA Games Malaysia 2027.
Iha Asia Games 2026 iha Aichi-Nagoya, Japaun, Timor-Leste partisipa iha atletismu, natasaun, voleibol praia, taekwondo, halterofilismu, wrestling no tiru ho arcu.
(leo)
