DILI, STLTIMORLESTE.com – Grupu Rezisténsia Abut Foun Fronteira rejeita akuzasaun hasoru Ministra Dulce, no konsidera informasaun sira ne’e la iha baze.
Porta-voz grupu, Moizes Ramos ho naran kodiku “Sakarai” hatete, informasaun ne’ebé sirkula liuhusi media sosial no komunikasaun seluk kona-ba Ministra Dulce de Jesus Soares, grupu rejeita ho firme.
Nia afirma, akuzasaun sira ne’e la iha baze faktu ne’ebé kle’an no komprensivu, no husu públiku atu konsidera konteksu istóriku rezistensia iha períodu okupasaun Indonézia.
Tuir Moizes, Ministra Dulce mai husi família ne’ebé apoiu Timor-Leste atu sai nasaun livre no independente, no nia ho alin na’in rua servisu nu’udar intérprete ba UNAMET iha 1999.
Nia mos afirma, Dulce iha koneksaun ho membru rezisténsia sira no hola parte iha estrutura klandestina rezistensia iha área fronteira.
“Ministra Dulce hola parte iha estrutura klandestina rezisténsia no fornese informasaun ba rede klandestina atu hatutan ba Falintil,” dehan Moizes iha konferénsia imprensa iha salaun CLN, Munisípiu Bobonaro, Segunda-feira (28/09/2026).
Moizes afirma, envolvimentu Dulce iha atividade klandestina, tuir grupu, hatudu nia lealdade ba luta ukun-rasik-an, no la’ós apoiu ba politika integrasaun ka autonomia.
Nia hatete grupu Abut Foun Fronteira fó rekonesimentu ba Dulce tanba nia kontribuisaun iha luta rezistensia iha área fronteira entre 1994 no 1999.
Tuir nia, durante períodu ne’ebá, Dulce hasoru risku no ameasa husi milísia no militar Indonézia, maibé kontinua halo atividade ne’ebé, tuir grupu, ajuda rezistensia.
Moizes mos afirma, Dulce uza nia pozisaun nu’udar “pejabat daerah” atu ajuda proteje jovem rezistensia balun iha área fronteira Maliana husi ameasa.
Nia esplika katak, servisu Dulce iha estrutura Estadu Indonézia durante okupasaun, tuir grupu, la signifika apoiu ba politika Indonézia.
Moizes afirma, Dulce ho nia kaben no intelektual Maliana na’in 40 resin simu orientasaun husi Koordenador CNRT Munisípiu Bobonaro, Manuel Magalhães, atu hola parte iha organizasaun BRTT.
Responsavel Grupu Rezistensia Abut Foun Fronteira, Domingos Viana, ho naran kodiku “Matan Furak”, mos afirma Dulce halo servisu iha área informasaun atu apoia grupu rezistensia Sub-Rejiaun Hafunan Bobonaro.
Nia hatete, tuir grupu, informasaun ne’ebé Dulce fornese inklui planu grupu pro-autonomia atu halo atake hasoru grupu independensia, no atividade militar Indonézia hasoru FALINTIL.
“Ami husu públiku atu para no korije informasaun sala kona-ba Ministra Dulce, no konsidera konteksu istóriku no realidade rezistensia ne’ebé kompleksu,” dehan Domingos.
Nia hatutan katak, grupu prontu atu fornese dokumentu ka informasaun adisionál ne’ebé bele ajuda verifika alegasaun sira ne’ebé sira aprezenta.
Konferénsia imprensa ne’e partisipa mós husi Komandante Pelotão de Comando Rejiaun 4, Carvorino Soares Gama “Hakiak”, Sekretáriu Zona Lolotoe, Nicolaus Moniz “Terus Lakikit”, Vise-Responsavel Grupu Rezistensia, Acásio Gonçalves “Baikinu”, Soldadu Falintil, Moizes Ramos “Sakarai” no Komandante Seksão Falintil, Domingos de Araújo “Hunter”.
Notísia kompleta lee iha Jornal STL edisaun Tersa (29/09/2026).
(dom)
