DILI, STLTIMORLESTE.com – Prezidente Repúblika (PR), José Ramos-Horta konsidera misaun iha Nova Iorke no Washington susesu ba diplomasia, tanba foti Timor-Leste (TL) nia naran iha mundu.
Prezidente hato’o deklarasaun ne’e ba jornalista bainhira remata nia vizita no fila mai Timor-Leste, Domingu (27/09/2026), liuhusi Aeroportu Internasionál Nicolau Lobato, Komoro.
Ramos-Horta hatete, durante misaun ne’e, nia partisipa iha enkontru no atividade diplomátika oioin ho lider país, Sekretáriu-Jerál ONU, ministru no embaixadór.
Nia konsidera atividade sira ne’e importante atu foti naran Timor-Leste iha mundu internasionál no hametin relasaun diplomátika ho país no organizasaun internasionál.
“Ha’u partisipa iha enkontru barak, la’ós de’it diskursu iha Asembleia Jerál ONU, maibé eventu paralelu sira mós foti Timor-Leste nia naran no susesu.” dehan PR Horta.
Prezidente hatete, Timor-Leste mós iha responsabilidade atu hato’o nia pozisaun kona-ba situasaun mundiál, hanesan país sira seluk ne’ebé partisipa iha forúns internasionál.
Nia esplika katak, diskusaun sira la limita de’it ba situasaun iha rai laran, maibé mós aborda problema no dezafiu sira ne’ebé afeta komunidade internasionál.
Durante iha Nova Iorke, Prezidente Ramos-Horta partisipa iha Semana Altu Nivel Sesaun Asembleia-Jerál Nasoins Unidas da-81, ne’ebé halibur lider no reprezentante husi país oioin.
Ajenda Timor-Leste nian inklui Debate Jerál, enkontru nivel aas, enkontru bilaterál no eventu paralelu kona-ba dezafiu internasionál prinsipál sira.
Iha 23 Setembru, Ramos-Horta hato’o deklarasaun nasionál Timor-Leste iha Asembleia-Jerál ONU, hodi aprezenta pozisaun Timor-Leste kona-ba asuntu internasionál sira.
Iha nia diskursu, Prezidente ko’alia kona-ba konflitu no krize umanitária ne’ebé afeta mundu, no defende diálogu no diplomasia nu’udar instrumentu atu promove pás.
Prezidente mós hato’o pozisaun kona-ba nesesidade atu hametin multilateralizmu no kooperasaun internasionál, liuliu iha tempu mundu hasoru dezafiu oioin.
Tema Sesaun Asembleia-Jerál ONU da-81 mak “Restaura Konfiansa, Jere Transformasaun: Nasoins Unidas ne’ebé responde ba nesesidade ema hotu.”
Iha Nova Iorke, Prezidente Ramos-Horta halo enkontru bilaterál ho lider país sira, nu’udar parte husi esforsu Timor-Leste atu hametin relasaun no kooperasaun internasionál.
Entre atividade sira, Ramos-Horta hasoru Prezidente Vietnam, Tô Lâm, iha Nova Iorke, hodi diskute relasaun bilaterál no oportunidade atu aprofunda kooperasaun entre nasaun rua.
Prezidente mós hasoru lider no personalidade internasionál sira durante atividade paralela Asembleia-Jerál ONU no líder oin oin.
Enkontru sira ne’e fó oportunidade ba Timor-Leste atu hato’o nia pozisaun kona-ba asuntu internasionál no buka área kooperasaun ho país no organizasaun sira.
Durante atividade paralela iha sede ONU, Prezidente partisipa iha eventu nivel aas kona-ba eliminasaun pobreza iha nia dimensaun hotu.
Eventu ne’e fó atensaun ba nesesidade atu renova kompromisu internasionál atu halakon pobreza no promove dezenvolvimentu ne’ebé inkluzivu.
Ramos-Horta mós apoia vizáun “Tolu Zero”, ne’ebé promove zero pobreza, zero dezempregu no zero emisaun karbonu líquidu.
Nia hato’o pozisaun ne’e iha eventu kona-ba negósiu sosiál, juventude no teknolojia, ne’ebé realiza iha margem atividade Asembleia-Jerál ONU.
(eme)
