DILI, STLTIMORLESTE.com – Fornesedór Programa Merenda Eskolar iha Eskola Baziku Filial (EBF) Hans Klem, Bairo Pite, nafatin uza ai-sunu hodi tein merenda ba estudante sira, maibé ahi no suar husi dapur dala ruma tama to’o iha sala aprendizajen.
Kestaun ne’e hato’o husi Kordenadora EBF Hans Klem, Bairo Pite, Celina Maria da Costa ba STL iha nia knar fatin, Segunda-feira (28/09/2026).
“Ami nia dapur agora fornesedór sira tein uza ai-sunu, entaun impaktu ne’e mak ahi no suar tama fali iha sala laran. Ami presiza tan refetóriu, para labarik sira bele simu hahan iha fatin apropriadu, la presiza lao distánsia dook no han iha sala laran, ne’ebé bele halo sala fo’er,” nia informa.
Nia hatutan katak, refetóriu presiza atu fasilita estudante sira bainhira simu no han merenda eskolar, tanba durante ne’e fornesedór sira tein uza ai-sunu, nune’e ahi no suar bele tama to’o iha sala prosesu aprendizajen.
Iha fatin hanesan, Xefi Fornesedór Merenda Eskolar iha EBF Hans Klem, Bairo-Pite, Teresa Soares Tilman, dehan fornesedór sira tein merenda ba estudante sira dala rua kada loron, uza ai-sunu no tuir menu ne’ebé determina ona.
“Loron ida ami tein hahan dala rua ba ita nia estudante sira. Ami tein uza ai-sunu no tuir menu ne’ebé iha ona. Estudante sira han etu, aifuan hanesan hudi no seluk tan, no ami mós tein naan karau,” nia informa.
Nia dehan, fornesedór sira tenke ba eskola sedu atu prepara merenda ba estudante sira. Bainhira tein, sira taka odamatan dapur hodi hamenus suar tama ba área eskola, no tein tuir menu ne’ebé determina ona.
Enkuantu ne’e, estudante EBF Hans Klem, Luis Mendes Nunes, hateten katak nia kontenti tanba bele simu merenda iha eskola.
“Ami sente kontenti tanba ami mai eskola han. Ami sai husi sala mak simu hahan husi fornesedór sira, ami han naan,” dehan nia.
(jac)
