DILI, STLTIMORLESTE.com – Profesor sira presiza uza métodu no maneira hanorin oi-oin iha sala aula, tanba estudante sira mai ho karakter no situasaun familiar ne’ebé la hanesan.
Diretór ESG 12 de Novembro, Marculino Menezes Babo hato’o ida ne’e ba STL iha Segunda-feira (28/09/2026), no dehan professor sira presiza halo aproximasaun ba estudante no inan-aman sira hodi ajuda hadi’a disiplina estudante.
“Hau hanoin ita professor presiza uza maneira oinsá atu hanorin estudante sira ne’ebé mai ho karakter la hanesan. Estudante balun mai kedas ho disiplina no balun lae. Tanba ne’e, ita sempre uza maneira aproximasaun ba estudante no mós inan-aman. Ami husu sira kumpri regra, no se la kumpri, eskola fó sansaun,” nia dehan.
Marculino hateten katak, estudante sira iha karakter ida-idak, nune’e professor sira presiza buka maneira apropriadu atu halo aproximasaun no ajuda estudante sira muda comportamento liuhusi orientasaun no komunikasaun.
Koordenadora EBF Vila-Verde, Josefina Maia, hatete katak estudante sira iha idade ki’ik, nune’e professor sira presiza uza maneira apropriadu hodi halo sira partisipa iha aula no rona esplikasaun.
“Ita nia estudante sira iha EBF ne’e mai ho idade ne’ebé ki’ik. Ita nia professor sira mak hanorin sira ho maneira oinsá, para ita nia estudante sira bele rona professor sira halo esplikasaun,” nia dehan.
Enkuantu ne’e, profesor EBC Fatumeta, Feliciano Gusmão hatete katak, professor sira presiza uza métodu oioin iha prosesu hanorin tanba estudante sira nia karakter la hanesan.
“Hau hanoin, se ita uza métodu ida la diak, ita uza fali seluk, tanba métodu oioin de’it ita uza. Balun ita ko’alia iha sala rona ita, no balun la rona. Ida ne’e mak dezafiu ne’ebé ita hasoru,” nia informa.
Feliciano dehan, sai professor presiza iha pasiénsia, tanba kada loron professor sira hasoru estudante ho karakter diferente.
Iha parte seluk, Kordenadora EBF Naroman, Joana Teresa Freitas, hateten katak estudante sira iha idade ki’ik no mai husi família ho situasaun diferente, nune’e sira mós iha karakter ne’ebé la hanesan.
“Ita hatene katak estudante sira iha EBF ne’e ho idade ne’ebé ki’ik. Sira mai husi família ne’ebé diferente, entaun sira mai ho karakter oioin. Maibé, professor sira nia knaar ida ne’e hanesan vokasaun espesial ida. Professor ida-idak presiza mantein nia pozisaun hodi bele identifika estudante sira mai husi família oinsá,” nia dehan.
Joana hateten katak, dala ruma estudante sira la tau atensaun ba orientasaun husi professor sira no halo buat ne’ebé professor sira bandu. Tanba ne’e, professor sira presiza iha pasiénsia no kontinua halo aproximasaun ba estudante sira.
Nia hatutan katak, estudante sira ne’ebé hasoru dificuldade oioin presiza hetan atensaun, hodi sira bele hakbesik an nafatin ba eskola no kontinua partisipa iha prosesu ensinu-aprendizajen.
“Labele ignora sira iha kotuk, tenke tau atensaun. Ami nia professor sira sempre uza maneira ida ne’e, nune’e estudante sira kada loron mai partisipa iha aula. Tanba estudante hirak ne’e mai ho karakter ne’ebé la hanesan, ita presiza hanorin ho maneira oioin,” nia informa.
(jac)
