DILI, STLTIMORLESTE.com – Maske droga Xina tama Timor livre ona, maibe operasaun konjunta PCIC ho SNI konsege detein sidadaun Xina nain-rua, iha Manleuana no Bebonuk tanba kazu tráfiku droga.
Polísia Investigasaun Sientífika Kriminál (PCIC) ho Servisu Nasionál Intelijênsia (SNI) detein sidadaun estranjeiru nain-rua ho nasionalidade Xina iha area Manleuana no Bebonuk, Dili.
Detensaun ne’e hala’o tanba suspeitu sira involve iha atividade tráfiku ilísitu droga, ne’ebé konsidera ameasa ba seguransa nasionál no futuru jerasaun foin-sa’e.
Akademista UNTL, Martinho Vieira fó apresiasaun boot ba operasaun konjunta ne’e, ne’ebé hatudu vigilánsia aas husi meius seguransa nasionál sira.
“Integrasaun intelijênsia no investigasaun kriminál hamutuk nu’udar xave boot, atu tesi krime organizadu. PCIC no SNI hatudu pasu importante,” dehan Martinho Vieira ba STL, iha Kaikoli, Dili, Segunda (28/06/2026).
Nia husu ba Governu atu kontinua fó apoiu meius no fasilidade ba PCIC ho SNI, hodi hafórsa kontrolu iha fronteira marítima, terrestre no aeroportu.
Iha fatin ketak, observadór polítika, António Magno, hateten susesu operasaun ne’e la’os de’it ba justisa, maibé mós reflesaun ba estabilidade seguransa nasionál.
“Susesu ne’e marka pasu ba justisa no seguransa interna. Estabilidade no kódigu seguransa presiza hamutuk forte hodi hamenus risku krime transnasionál,” dehan António Magno.
Entretantu tuir informasaun neebe iha durante fulan ida nia laran, investigador PCIC no SNI halo monitorizasaun intensivu ba suspeitu nain-rua iha Manleuana no Bebonuk.
Tanba deskonfia forte sira involve iha atividade ilísitu droga ne’ebé ameasa seguransa nasionál Timor-Leste tomak.
Operasaun halo ho flagrante delitu, PCIC konsege apreende telemovel lima, osan cash US$ 14.900 no Rp 2.904.000 ne’ebé suspeita mai husi faan droga, hamutuk mina metanfetamina 300 mililitru no kristal grama 9 iha fatin akontesimentu.
(car)
