DILI, STLTIMORLESTE.com – Médiku F-FDTL nain rua (2) remata estudu espesialista Cardiologia no Anestesia-Reanimasaun iha Kuba.
Liu husi Komunikadu Impresa ne’ebe STL asesu iha media F-FDTL katak,Membru F-FDTL nain rua, Major Manuel Mendes Pereira no Tenente João dos Santos de Jesus, remata estudu espesialista iha área saúde.
Sira halo aprezentasaun ofisiál ba Vise-Xefe Estadu-Maior Jenerál F-FDTL, Major Jenerál Calisto Santos Coliati.
Major Manuel Mendes Pereira remata espesializasaun Cardiologia durante tinan tolu iha Kuba.
Enkuantu Tenente João dos Santos de Jesus remata espesializasaun Anestesia no Reanimasaun durante tinan haat.
Programa estudu ne’e parte husi kooperasaun bilaterál Timor-Leste ho Kuba iha área saúde no formasaun rekursu umanu.
Programa ne’e mós objetivu atu reforsa kapasidade Servisu Saúde Militár F-FDTL, liuliu iha área espesializasaun médika.
Tuir Vise-Xefe Estadu-Maior Jenerál F-FDTL, Major Jenerál Calisto Santos “Coliati” hato’o kongratulasaun ba médiku nain rua.
Nia apresia esforsu, dedikasaun no kompromisu médiku nain rua nian ne’ebé konsege remata formasaun espesialista ho susesu.
“Ita-nia Forsa presiza kuadru espesialista iha área saúde. Ida ne’e orgullu ba F-FDTL no Nasaun tomak,” hateteVise-Xefe Estadu-Maior Jenerál F-FDTL, Major Jenerál Calisto Santos “Coliati” ba jornalista sira iha Kuartel Jeneral F-FDTL Fatuhada Dili, Segunda feira (28/09/2026).
Nia hatete médiku espesialista sira bele kontribui atu hadi’a atendimentu médiku ba militár, família militár no komunidade.
“Husi imi-nia matenek no esperiénsia, ita bele hadia atendimentu médiku liu husi kooperasaun ho Ministériu Saúde,”nia esplika.
Vise-Xefe Estadu-Maior mós apela ba médiku nain rua atu aplika koñesimentu ne’ebé sira hetan durante formasaun iha Kuba.
Nia husu sira atu kontribui ba dezenvolvimentu no fortalecimento sistema saúde militár F-FDTL.
Médiku espesialista nain rua mós esperadu sai ezemplu ba jerasaun foun iha F-FDTL.
(jen)
