DILI, STLTIMORLESTE.com — PSIK no SNI deteta sidadaun Xineza na’in-rua (2) suspeitu droga iha Manleuana no Bebonuk, madrugada 27 Setembru 2026.
Xefe Investigasaun PSIK, Mario Francisco de A. Tavares hatete, autoridade sira deteta substánsia suspeita iha posse suspeitu JN no QJ.
“Depois detensaun, ekipa lori suspeitu sira ba PSIK atu halo teste rápidu ba substánsia ne’ebé apreende,” hatete Mario iha edifísiu PSIK Caicoli, Dili, Segunda-feira (28/09/2026).
Nia hatete, rezultadu teste rápidu hosi laboratóriu PSIK hatudu substánsia apreende pozitivu ba vitamina A no metanfetamina.
Ekipa PSIK mós koopera ho servisu saúde no Hospital Nasionál Guido Valadares (HNGV) atu halo teste urina ba suspeitu JN.
“Teste urina ba JN hetan rezultadu pozitivu ba MDMA, vitamina A no substánsia metanfetamina,” nia informa.
Mario hatete, suspeitu sira hela iha detensaun polísia durante oras 72, antes autoridade sira aprezenta sira ba Primeiru Interrogatóriu.
“Investigasaun sei hatudu kona-ba iha ka lae ligasaun ho ema seluk iha kazu ne’e,” nia koalia.
Tuir nia esplikasaun, PSIK sei analiza komunikasaun no dadus hosi telemóvel sira atu determina eventual ligasaun ho ema seluk.
Nia hatete, rezultadu ezaminasaun telemóvel sei ajuda determina koneksaun entre suspeitu na’in 2 no ema seluk.
Mario mós informa katak, semana kotuk PSIK deteta sidadaun Indonézia ho inisial W, tanba suspeita lori substánsia droga.
PSIK no SNI kontinua servisu hamutuk, enkuantu prosesu investigasaun ba kazu sira ne’e sei kontinua tuir prosedimentu legál.
PSIK prepara dokumentus atu submete kazu ba Ministériu Públiku no husu validasaun tribunal tuir prosesu legál.
Nunee mos Akademista UNTL, José Costantino Ximenes fó apresiasaun ba PSIK no SNI tanba deteta sidadaun Xineza na’in-rua ne’ebé suspeitu envolve iha kazu droga.
“Hau fó parabéns ba PSIK no SNI. Kazu ne’e tenke prosesu tuir lei ne’ebé vigora iha ita-nia rain,” nia informa.
Aleinde substánsia suspeita, PSIK apreende osan US$ 14.900, osan Indonézia Rp 200.000 no telemóvel 50 durante operasaun.
Telemóvel lima ne’e sei sujeita ba ezaminasaun atu ajuda investigasaun kona-ba kazu refere no determina eventual koneksaun ho ema seluk.
(jen)
