DILI, STLTIMORLESTE.com – Ensinu Baziku Filial (EBF) Hans Klem, Bairo Pite, aplika regra ba profesores sira katak, bainhira tarde to’o minutu 30, konsidera nu’udar falta.
Informasaun ne’e hato’o husi Kordenadora EBF Hans Klem, Bairo-Pite, Celina Maria da Costa ba STL iha nia knar fatin, Tersa (29/09/2026).
Nia hateten katak, profesores sira tenke to’o eskola tuku 07:30 dader. Depois tuku 07:40 ka 07:45, eskola hala’o atividade dader nian, hanesan reza, leitura no kanta Hino Nasional. Tuku 08:00, estudantes no profesores tama ona ba sala de aula atu hahú prosesu aprendizajen.
“Hau hanoin ami nian profesores sira tuku 07:30 tenke iha ona. Tarde liu mak tuku 07:40 depois 07:45 ami forma halo atividade dader nian, reza, leitura, kanta Hino Nasional. Depois tuku 08:00 ami tama aula. Regras ida ami fó ba profesores sira mak, kuandu tarde minutu 30, ne’e konsidera falta,” nia katak.
Iha fatin seluk, Kordenadora EBF Vila-Verde, Josefina Maia dehan, profesores sira iha eskola refere sempre to’o sedu, atu prepara estudantes sira molok tama ba sala de aula.
Nia hateten katak, profesores sira hanorin tuir oras, maibé bainhira profesor ida moras ka hetan lisensa, tenke fó informasaun ba parte eskola nian atu eskola bele hatene.
“Ami nian profesores sira dader mai iha eskola, depois haruka ita nian estudantes sira forma molok tama iha sala de aula. Maibé bainhira ita nian professores balun moras ka lisensa, ne’e fó informasaun mai eskola,” nia akresenta.
Tuir Josefina, molok hala’o prosesu aprendizajen, profesores sira mos halo planu aula. Regras ba profesores sira ne’e nafatin kumpri, inklui mai sedu eskola atu bele tama sala de aula no hala’o prosesu ensinu-aprendizajen ba estudantes.
Enkuantu ne’e, Diretor EBC Manleuana, Carlos Correia, dehan eskola nafatin halo kontrolu ba profesores sira. Tuir nia, kontrolu diretu ba profesores sira sai responsabilidade hosi diretor adjuntu, enkuantu nia halo kontrolu jerál.
“Kontrola ita nian profesores sira ne’e adjuntu nian. Hau halo kontrola jerál deit, maibé durante ne’e ami nian profesores mai ho pontualidade,” nia deklara.
(jac)
