DILI, STLTIMORLESTE.com — Primeiru-Ministru (PM) Kay Rala Xanana Gusmão, Terça-feira (29/09/2026), hala’o enkontru ho CEO Caritas Austrália, Kristen Sayers, Bispu Michael Kennedy no Xefe Eskritóriu Caritas iha Timor-Leste, Fernando Pires, iha Palásiu Governu, Dili.
Enkontru ne’e fó oportunidade ba parte rua atu ko’alia kona-ba projetu no programa sira ne’ebé Caritas hala’o iha Timor-Leste, inklui apoiu umanitáriu, dezenvolvimentu komunidade no resposta ba dezafiu sira ne’ebé povu Timor-Leste enfrenta.
Bispu Michael Kennedy dehan delegasaun Caritas Austrália simu boas-vindas hosi PM Xanana Gusmão ho “generozidade tebes” no iha oportunidade atu rona diretamente kona-ba dezafiu, istória no esperiénsia povu Timor-Leste nian.
Nia hateten, PM Xanana mós fahe informasaun kona-ba istória nasaun Timor-Leste, inklui luta no dezafiu sira ne’ebé povu liu hosi hamutuk.
“Primeiru-Ministru simu ami ho generozidade tebes no fó tempu barak ba ami. Ami iha oportunidade atu ko’alia kona-ba projetu balun ne’ebé Caritas hala’o iha Timor-Leste. Ami kontente tebes tanba Primeiru-Ministru fahe ho ami kona-ba dezafiu balun ne’ebé povu Timor-Leste hasoru, maibé mós kona-ba orgullu no ksolok boot ne’ebé eziste iha povu Timor-Leste,” dehan Bispu Michael Kennedy.
Nia mós hato’o apresiasaun ba PM Xanana tanba tempu no oportunidade ne’ebé fó ba delegasaun Caritas atu ko’alia kona-ba servisu sira ne’ebé hala’o iha Timor-Leste.
Enkuantu, Xefe Eskritóriu Caritas iha Timor-Leste, Fernando Pires, dehan Caritas Austrália la’o hamutuk ho povu Timor-Leste desde finál tinan 1990 sira, no hahú iha prezensa físika iha Timor-Leste hosi tinan 1999.
Nia hateten, Caritas kontinua akompaña komunidade sira diretamente, liuliu iha área violénsia bazeia ba jéneru, reziliénsia komunidade, resposta umanitária no mudansa klimátika.
“Ba ami, importante tebes atu akompaña no hasoru komunidade sira diretamente, iha fatin ne’ebé sira hela no moris, no fó apoiu iha área violénsia bazeia ba jéneru, reziliénsia, resposta umanitária no mudansa klimátika,” haktuir Fernando Pires.
Nia dehan, Caritas hakarak kontinua servisu hamutuk ho Igreja, juventude, feto no parte hotu iha sosiedade Timor-Leste atu responde ba dezafiu sira no apoiu prosesu dezenvolvimentu iha futuru.
“Objetivu mak atu fó apoiu no akompaña Timor-Leste iha ita-nia viajen notável nu’udar nasaun ida,” dehan nia.
Fernando Pires mós hato’o agradecimentu ba PM Xanana Gusmão tanba simu delegasaun Caritas Austrália no fó oportunidade ba sira atu hasoru malu no ko’alia kona-ba servisu Caritas iha Timor-Leste.
Enkontru ne’e reforsa kontinuasaun kooperasaun entre Caritas Austrália, Igreja no komunidade Timor-Leste iha área umanitária no dezenvolvimentu.
(jos)
