DILI, STLTIMORLESTE.com – Polísia Sientífika Investigasaun Kriminal (PSIK) simu ona delegasaun kompeténsia hosi Ministériu Públiku (MP) atu kontinua investigasaun kazu Scam Call Center.
Portavoz PSIK, Mario Tavares hatete, kazu Scam Call Center aprezenta dezafiu tanba envolve atividade iha espasu dijitál.
Nia hatete, kazu sira ne’ebé akontese durante fulan Juñu no Jullu 2026, PCIC rezista kazu hamutuk sia.
“Molok férias judisiál remata, ami simu delegasaun kompeténsia hodi kontinua investigasaun kazu sira-ne’e,” hatete Portavoz PSIK, Mario Tavares ba jornalista sira iha salaun PSIK, Dili, Tersa-feira (29/09/2026).
Mario hatete, prazu prosesual investigasaun normalmenti loron 90, maibé se investigasaun seidauk remata, prosesu bele kontinua tuir nesesidade.
Delegasaun kompeténsia hosi Ministériu Públiku fó prioridade ba arguidu sira ne’ebé atualmente hela iha medida koasaun preventiva.
Nia hatete PSIK sei kontinua buka identidade autor prinsipál sira ne’ebé envolve diretamente iha atividade Scam Call Center.
“PSIK sei kontinua investigasaun tanba seidauk identifika ho klaru autor prinsipál sira ne’ebé envolve iha kazu Scam Call Center,” deklara nia.
Akademista Universidade Nasionál Timor-Leste (UNTL), José Costantino Ximenes husu PSIK no PNTL atu reforsa esforsu kombate Scam Call Center iha Timor-Leste.
Nia konsidera atividade Scam Call Center bele prejudika povu Timor-Leste no sidadaun hosi nasaun seluk.
“Ita tenke kombate Scam Call Center atu prevene povu Timor-Leste no sidadaun hosi nasaun seluk sai vítima,” afirma José Costantino.
Nia hatete, atividade hirak-ne’e envolve enganu ema hodi hasai osan, nune’e presiza prevensaun no asaun efetiva hosi autoridade kompetente.
Objetivu ikus mak hasa’e dignidade no imajen instituisaun Estadu, liuhosi servisu diak ba povu no Nasaun.
(jen)
