DÍLI, STLTIMORLESTE.com — Delegasaun National University of Singapore hasoru Prezidente José Ramos-Horta, hodi diskute kooperasaun bilateral no oportunidade dezenvolvimentu.
Líder delegasaun, Soh Yi Da hatete, enkontru ho Prezidente Repúblika iha Palásiu Prezidensiál Nicolau Lobato, Bairo Pite, Tersa (29/09/2026), ho objetivu troka hanoin kona-ba relasaun bilateral.
“Ami mai husi National University of Singapore ba misaun negósiu iha Timor-Leste no troka hanoin kona-ba kooperasaun entre nasaun rua.”
Soh Yi Da hatete, delegasaun ne’e sei hela iha Timor-Leste durante loron haat atu hasoru ministériu, ofisiál governu no Kámara Komérsiu.
Nia hatete, enkontru sira sei fó oportunidade ba delegasaun atu komprende liután Timor-Leste nia papél iha jeopolítika rejionál no globál.
Prezidente Repúblika José Ramos-Horta mos fahe nia esperiénsia moris no lideransa, no enkoraja delegasaun atu partisipa iha esforsu harii ekipa no dezenvolve nasaun.
“Ami sei hela durante loron haat atu hasoru ministériu, ofisiál governu no Kámara Komérsiu, hodi aprende kona-ba oportunidade potensiál iha Timor-Leste.”
Soh Yi Da hatete, delegasaun hakarak komprende oportunidade ekonómika no negósiu iha Timor-Leste, no haree oinsá Singapura bele kontribui ba dezenvolvimentu nasional.
Nia hatete, kooperasaun Timor-Leste no Singapura bele dezenvolve liután liuhusi identifikasaun oportunidade no esforsu hamutuk iha área ekonómika no dezenvolvimentu.
Iha enkontru ho Prezidente Ramos-Horta, lideransa no futuru Timor-Leste mos sai tópiku importante ne’ebé delegasaun diskute hamutuk.
“Ha’u hanoin Prezidente fó prioridade ba importánsia harii forsa intelektuál forte, ho ema vizaun atu foti Timor-Leste ba lideransa boot iha futuru.”
National University of Singapore mak universidade importante iha Singapura, no delegasaun ne’e mai Timor-Leste ho misaun negósiu durante loron haat.
Durante estadia, delegasaun sei halo enkontru ho instituisaun governamentál no entidade komersiál sira hodi komprende oportunidade negósiu iha Timor-Leste.
Misaun ne’e mos buka oportunidade atu haforsa relasaun no kolaborasaun entre Singapura no Timor-Leste, liuliu iha área ekonómika, kapasidade umana no dezenvolvimentu nasional.
(eme)
