DILI, STLTIMORLESTE.com — Fundasaun Mahein (FM) husu koordenasaun interinstitusionál ne’ebé forte atu kombate krimi organizada no Scam Call Center.
Diretór Ezekutivu FM, Nelson Belo hatete, PNTL, Servisu Migrasaun, DNSC, Ministériu Públiku, Intelijénsia no entidade relevante sira hala’o knar tuir kompeténsia.
Maibé, nia konsidera seidauk iha komandu konjunta ne’ebé koordena operasaun, investigasaun no partilha informasaun entre instituisaun sira.
“Ita haree seidauk iha komandu konjunta ida ne’ebé koordena operasaun, investigasaun no partilha informasaun entre instituisaun sira,” hatete Nelson Belo.
Nia koalia ba jornalista sira iha salaun FM, Dili, tersa-feira (29/09/2026), kona-ba nesesidade hametin koordenasaun kontra krimi organizada no Scam Call Center.
Nelson hatete, intervensaun dala barak la kontinua, tanba suspeitu sira ne’ebé hetan kaptura bele fila fali ba atividade ilegal depois hosi prosesu judisiál.
“Iha kazu balun, ita hatene suspeitu sira depois hosi prosesu judisiál bele envolve fali iha atividade ilegal ka kazu foun,” nia dehan.
Nia konsidera falta koordenasaun bele halo atividade kriminál muda ba fatin foun no kontinua, inklui atividade Scam Call Center.
“Bainhira operasaun la planeia hamutuk, situasaun ne’e bele hamosu risku ba evidénsia importante lakon no halo investigasaun la kompletu,” nia informa.
FM konsidera Scam Call Center bele aproveita lakuna entre instituisaun sira atu kontinua atividade ilegal, tanba mekanizmu koordenasaun seidauk forte.
Tanba ne’e, FM husu mekanizmu klaru hodi kontrola ema estranjeiru ne’ebé tama Timor-Leste no atividade sira ne’ebé hala’o iha rai laran.
Mekanizmu ne’e inklui verifikasaun visa, atividade profisionál, sponsor, fatin servisu no ligasaun ho atividade suspeita.
“Se iha indikasaun forte kona-ba ema ida nia envolvimentu iha krimi, instituisaun relevante tenke halo medida tuir lei,” nia deklara.
Nelson Belo subliña, problema la’ós de’it iha lei, maibé mos iha implementasaun no koordenasaun entre instituisaun kompetente sira.
“Lei ne’ebé forte de’it la sufisiente se aplikasaun la koordenadu no laiha prosedimentu operasionál ne’ebé klaru,” nia hatutan.
FM propoin estabelese Komandu Konjunta Kontra Krimi Organizada no Scam Call Center, ho reprezentante hosi instituisaun relevante sira.
Komandu ne’e bele koordena investigasaun, partilha informasaun no inteligência, no planeia operasaun hamutuk tuir prosedimentu legal.
Mekanizmu ne’e mos bele akompaña suspeitu no rede kriminál, asegura evidénsia, no monitoriza fatin ho atividade suspeita.
FM konsidera avaliasaun regular ba rezultadu intervensaun importante atu identifika fraqueza no hadi’a koordenasaun entre instituisaun sira.
Nia hatete, objetivu proposta ne’e la’ós atu troka kompeténsia instituisaun ida-idak, maibé atu hametin servisu hamutuk no responsabilidade.
“Ita husu mekanizmu konjunta ne’e presiza iha linha komandu klaru, partilha informasaun efetiva no responsabilidade entre entidade sira,” nia afirma.
(jen)
