DILI, STLTIMORLESTE.com — Prezidente Repúblika (PR), José Ramos-Horta simu karta kredensia husi Embaixadór Vietnam, Pham Binh Dam.
Prezidente Repúblika José Ramos-Horta simu karta kredensia husi Pham Binh Dam, ne’ebé akredita nu’udar Embaixadór rezidente dahuluk Repúblika Sosialista Vietnam nian ba Timor-Leste.
Serimónia entrega karta kredensia hala’o iha Palásiu Prezidensiál Nicolau Lobato, Bairo Pite, Dili, Tersa-feira (29/09/2026), no marka etapa foun iha relasaun diplomátika entre nasaun rua.
Vise-Ministra Negósius Estranjeirus no Kooperasaun, Jesuina Maria Ferreira Gomes, hatete Embaixadór foun Vietnam nian sai nu’udar embaixadór rezidente dahuluk ba Timor-Leste.
“Vietnam antes ne’e iha embaixada iha Indonézia no reprezentante la rezidente iha Timor-Leste,” hatete Vise-Ministra MNEK.
Nia mós hato’o agradese ba Governu Vietnam tanba apoiu ne’ebé kontinua fó ba Timor-Leste, inklui apoiu ba prosesu preparasaun Timor-Leste nia membru ASEAN.
Timor-Leste no Vietnam estabelese relasaun diplomátika iha 28 Jullu 2002, no agora reprezentasaun diplomátika Vietnam iha Timor-Leste eleva ba nivel embaixadór rezidente.
Embaixadór Pham Binh Dam nu’udar diplomata kareira ho esperiénsia liu tinan 20 iha Ministériu Negósius Estranjeirus Vietnam.
Antes nomeasaun, nia serbisu iha pozisaun Diretór-Jerál Sekretariadu Nasionál ba APEC Vietnam no iha ona pozisaun diplomátika oioin iha rai-li’ur.
Nia mós serbisu nu’udar Segundu Sekretáriu iha Delegasaun Permanente Vietnam ba UNESCO iha Paris, Embaixadór Vietnam ba Emiradus Árabes Unidus no Konsul-Jerál Vietnam iha Hong Kong.
Iha Ministériu Negósius Estranjeirus Vietnam, Dam kaer ona pozisaun sénior, inklui Diretór-Jerál Departamentu Interpretasaun no Tradusaun no Diretór-Jerál Diresaun Protokolu no Interpretasaun.
Embaixadór Dam iha grau Mestradu iha Diplomasia no Komérsiu husi Universidade Monash, ho esperiénsia iha lei internasionál, diplomasia ekonómika no dezenvolvimentu rekursu umanu.
Akreditasaun embaixadór rezidente dahuluk ne’e subliña dezenvolvimentu relasaun bilaterál entre Timor-Leste no Vietnam, ne’ebé kontinua hametin dezde 2002.
Nasaun rua komprometidu atu respeita lei internasionál, inklui UNCLOS 1982, no promove pás, estabilidade, seguransa no liberdade navegasaun no aviaun iha rejiaun.
Timor-Leste no Vietnam mós apoia rezolusaun pasífika ba disputa, implementasaun Deklarasaun kona-ba Konduta Partidu sira iha Tasi Leste no negosiasaun Kódigu Konduta.
Prezidente Ramos-Horta vizita Vietnam iha Jullu 2024 hodi selebra tinan 22 relasaun diplomátika no vizita tan iha Fevereiru 2025 ba Fórum Futuru ASEAN.
Iha 12 Abril 2026, Embaixada Vietnam iha Dili hahú ofisialmente operasaun, hamutuk ho aumentu kontaktu no kooperasaun entre nasaun rua.
Iha Juñu 2026, Primeiru-Ministru Xanana Gusmão partisipa iha Fórum Futuru ASEAN 2026 iha Hanoi durante vizita ofisiál ba Vietnam.
Kooperasaun foun inklui akordu kona-ba izensaun vistu, ensinu superiór, kooperasaun edukasionál no memorandu entre VNA no TATOLI.
Komérsiu bilaterál entre Timor-Leste no Vietnam atinji millaun US$18,7 iha 2025, enkuantu Telemor, propriedade Viettel, kontinua nu’udar operadór telekomunikasaun importante iha Timor-Leste.
Vietnam mós kontinua apoia Timor-Leste nia adezaun ba ASEAN, inklui liuhusi bolsa estudu no formasaun iha área ICT, agrikultura no dezenvolvimentu dijitál.
Prezidente Ramos-Horta hato’o benvindu ba Embaixadór Pham Binh Dam no subliña importánsia husi parseria ne’ebé kontinua aumenta.
“Akreditasaun Embaixadór Rezidente dahuluk husi Vietnam nu’udar prova ba ligasaun forte no vizaun komún ba futuru,” katak Prezidente Ramos-Horta.
Prezidente Ramos-Horta hatete Vietnam sai parseiru importante ne’ebé apoia Timor-Leste ba ASEAN no fó asisténsia iha edukasaun, teknolojia no agrikultura.
Nia fiar katak, esperiénsia Embaixadór Pham Binh Dam sei ajuda hasa’e tan kooperasaun bilaterál no hametin pás, estabilidade no prosperidade iha rejiaun.
(eme)
