DILI, STLTIMORLESTE.com — Deputadu Parlamentu Nasionál (PN) husu Governu atu fó apoiu ba rekuperasaun negósiu ba komersiante vítima inséndiu iha Merkadu Taibesi no Komoro, ne’ebé akontese iha Setembru 2026.
Xefe Bankada PLP, Maria Angelina Sarmento hatete katak, inséndiu iha Merkadu Taibesi, loron 25 Setembru, deskonfia kauza husi kortu sirkuitu eletrisidade iha warung ida, ne’ebé afeta komersiante na’in 150.
Nia relata katak, inséndiu ne’e hamosu prejuízu finanseiru ba komersiante sira, inklui vendedór sigaru ida ne’ebé lakon osan US$ 5.000 no vendedór ekipamentu eletróniku ne’ebé sofre prejuízu US$ 4.000.
Aleinde ne’e, família komersiante ida ne’ebé membru família ida servisu iha Austrália relata lakon osan US$45.000. Vendedór ambulante na’in tolu ne’ebé rai osan iha negósiu seluk mós lakon osan hamutuk US$ 1.700.
Tanba ne’e, deputada Angelina husu Administradór Munisípiu Dili atu orienta ekipa jestaun merkadu hodi halo levantamentu detalhadu kona-ba komersiante afetadu, tipu negósiu no total prejuízu ne’ebé sira sofre.
“Husu ba MCAE atu servisu hamutuk ho Munisípiu Dili, hodi haree pakote rekuperasaun ruma atu ajuda komersiante sira hadia fali sira-nia ekonomia,” Angelina Sarmento hatete iha plenária PN, Tersa (29/09/2026).
Nia mós lamenta katak, komersiante balu relata difikuldade atu hatama informasaun kona-ba sira-nia prejuízu ba ekipa jestaun merkadu, maski sira sai vítima hosi inséndiu.
Deputada ne’e husu ekipa jestaun merkadu atu halo levantamentu ho responsabilidade no transparente, hodi asegura katak komersiante hotu ne’ebé afetadu hetan rejistu no asesu ba apoiu.
Iha parte seluk, deputadu Bankada FRETILIN, Antoninho Doutel Sarmento, hato’o solidariedade ba komersiante vítima inséndiu iha Merkadu Taibesi no eis Merkadu Komoro, ne’ebé hetan inséndiu iha loron 25 no 27 Setembru 2026.
Antoninho husu Governu atu halo levantamentu ba estragus no fó apoiu lalais ba komersiante sira ne’ebé hasoru difikuldade ekonómika tanba inséndiu.
“Korajen nafatin ba sira. Hau husu Governu atu atua no fó resposta lalais ba komersiante sira ne’ebé sai vítima hosi akontesimentu ne’e,” nia dehan.
Nunee mos Deputadu Bankada CNRT, José Virgílio, mós husu Governu atu fó apoiu rekuperasaun ba komersiante vítima inséndiu iha Merkadu Taibesi no Komoro, inklui konsidera kompensasaun ba estragus ne’ebé sira sofre.
“Hanesan deputada Maria Angelina temi, tenke haree rekuperasaun ne’e, atu sira bele hetan 50% hosi total estragus ne’ebé sira sofre,” José Virgílio afirma.
Nia mós lamenta kona-ba falta atendimentu hosi Prezidente Autoridade Munisipál Dili ba komersiante sira ne’ebé enfrenta situasaun difísil, no husu autoridade munisipál atu marka prezensa iha terenu.
“Hau telefone Prezidente Autoridade Munisipál Dili, maibé la simu. Iha situasaun hanesan ne’e, autoridade tenke tun ba terenu atu haree komunidade no halo levantamentu,” nia dehan.
Hatan ba preokupasaun deputadu sira, Vise-Ministru Asuntu Parlamentár, Aderito Hugo, hatete katak membru Governu relevante, inklui Prezidente Autoridade Munisipál Dili, iha ona terenu atu halo levantamentu ba komersiante afetadu.
Nia asegura katak, Governu simu preokupasaun deputadu sira kona-ba vítima inséndiu iha Merkadu Taibesi no Komoro, no autoridade relevante sira atua hela hodi responde ba situasaun ne’e.
(alb)
