DILI, STLTIMORLESTE.com — Bankada FRETILIN kritika alegasaun kona-ba utilizasaun ambulánsia Ministériu Saúde ba atividade polítika CNRT iha Postu Administrativu Uatukarbau, Munisípiu Viqueque.
Deputada Bankada FRETILIN, Mariquita Soares hato’o kestaun ne’e iha plenária Parlamentu Nasionál (PN), Tersa (29/09/2026), no husu Komisaun Anti-Korrupsaun (KAK) atu investiga alegasaun ne’e.
Mariquita afirma katak, tuir informasaun ne’ebé nia simu hosi komunidade, ambulánsia ho matríkula 06865G, ne’ebé alokadu iha Sentru Saúde Uatukarbau, utiliza atu lori diretór ida hosi Ministériu Saúde ba enkontru KPDS CNRT.
Alegasaun ne’e refere ba atividade polítika ne’ebé akontese iha Postu Administrativu Uatukarbau, iha loron 19 Setembru 2026.
“Tuir informasaun ne’ebé ami simu hosi komunidade, ambulánsia hosi Uatukarbau mai Dili lori diretór ida hosi Ministériu Saúde atu partisipa enkontru KPDS CNRT,” Mariquita dehan.
Nia konsidera katak, se alegasaun ne’e loos, utilizasaun veíkulu Estadu ba atividade partidu polítiku viola prinsipiu transparénsia no separasaun entre rekursu públiku ho interese partidáriu.
Tanba ne’e, deputada ne’e husu KAK atu loke investigasaun hodi klarifika utilizasaun ambulánsia ne’e no determina se iha violasaun ba lei.
“Hau husu KAK atu tau atensaun no halo investigasaun ba aktu ne’e, hanesan investigasaun ne’ebé KAK halo ona ba individu balu ne’ebé utiliza kareta Estadu iha loron feriadu,” nia rekomenda.
Mariquita mós subliña katak, ambulánsia ne’e alokadu iha sentru saúde atu transporta pasiente ba tratamentu, la’ós atu fasilita atividade polítika, tanba komunidade balu sei hasoru difikuldade transporte ba servisu saúde.
Entretantu, deputadu Bankada CNRT, Anacleto Freitas, rejeita alegasaun ne’ebé Mariquita hato’o, no nega katak militante CNRT iha Viqueque utiliza ambulánsia ba atividade partidária.
Anacleto, nu’udar Koordenadór CNRT iha Munisípiu Viqueque, afirma katak nia rasik mak lidera reuniaun partidu nian, maibé la iha militante ida mak utiliza ambulánsia ba atividade ne’e.
“Hau hanoin informasaun ne’e la loos, tanba hau mak lidera reuniaun CNRT iha Viqueque, maibé la iha militante ida mak utiliza ambulánsia atu tuir atividade partidu nian,” Anacleto rejeita.
Nia husu Mariquita atu verifika informasaun ne’ebé nia simu molok aprezenta iha plenária, hodi evita hamosu preokupasaun iha públiku.
Anacleto mós afirma katak, ambulánsia ne’ebé Ministériu Saúde aloka ba sentru saúde sira iha munisípiu hotu-hotu iha responsabilidade atu transporta pasiente ba tratamentu.
Hatan ba kestaun ne’e, Vise-Ministru Asuntu Parlamentár, Aderito Hugo da Costa, afirma katak funsionáriu públiku no titular kargu xefia sira bandu atu utiliza fasilidade Estadu ba atividade partidária ka interese privadu.
“Funsionáriu sira ka titular kargu xefia sira bandu atu utiliza fasilidade Estadu nian ba atividade partidária ka atividade privadu, tanba lei la permite,” Aderito Hugo dehan.
Nia enkoraja partidu polítiku sira atu halo sosializasaun ba kuadru no simpatizante sira kona-ba disiplina no utilizasaun rekursu Estadu tuir lei.
Aderito afirma katak, kuadru partidu polítiku ne’ebé hala’o knaar públiku tenke hatene separa responsabilidade partidária hosi obrigasaun profisionál nu’udar funsionáriu Estadu.
Nia mós husu partidu polítiku sira atu eduka no responsabiliza kuadru sira ne’ebé viola regra utilizasaun fasilidade públika, hodi proteje integridade instituisaun no naran partidu.
(alb)
