DILI, STLTIMORLESTE.com – Juíza Ana Paula Fonseca, ne’ebé antes prezide prosesu Primeiru Interogatóriu (PI) kona-ba kazu droga, deklara katak iha intervensaun administrativa, ne’ebé tuir nia, la devia akontese iha prosesu judisiál.
“Iha intervensaun administrativa ne’ebé la devia halo mai iha juízes. Para mais, la’ós primeira vez. Antes ne’e, iha Primeiru Interogatóriu ne’ebé hau prezide, obriga hau nia ofisiál atu sai hosi sala audiénsia. Maibé ida-ne’e la akontese, tanba hau mantein firma nafatin to’o Primeiru Interogatóriu remata,” Deklara Juíza Ana Paula Fonseca iha sala julgamentu Tribunal Dili, Tersa-feira (29/09).
Nia hatutan katak, depois iha ordem atu hamamuk gabinete sira atu fó espasu ba juízes hosi Tribunal sira seluk, enkuantu desizaun KSMJ kona-ba transferénsia sei iha prosesu reklamasaun.
“Obriga mós ami tenke hamamuk ami nia gabinete sira, atu bele fó fali espasu ba juízes sira ne’ebé mai hosi Tribunal sira seluk, enkuantu desizaun KSMJ ami sei halo hela reklamasaun no seidauk iha efeitu legal,” dehan nia.
Nunee mos, Jurista Sérgio Dias Quintas hateten katak, kada fulan juízes sira iha lista plantão ka pikete atu atende prosesu urjente, hanesan Primeiru Interogatóriu no prosesu sumáriu.
“Kada fulan juízes sira iha lista halo plantão ka pikete ba prosesu urjente hanesan Primeiru Interogatóriu (PI) no prosesu sumáriu. Bainhira juíz ida hetan ona loron pikete ka prosesu distribuisaun kona ba nia, juíz ne’e iha kompeténsia atu kaer prosesu, laiha tan ema seluk atu manda ka orienta nia,” dehan Sérgio Dias Quintas.
Nia liga situasaun ne’e ho prinsipiu independénsia magistradu judisiál.
Estatutu Magistradu Judisiál Timor-Leste estabelese prinsipiu katak magistradu judisiál julga tuir Konstituisaun, lei no sira-nia konsiénsia, no la sujeitu ba ordem, instrusaun ka diretiva, ho esesaun ne’ebé lei prevee.
Iha parte seluk, akademiku UNTL, Rafael de Jesus hateten katak, juízes tenke hala’o sira-nia knaar independente no tuir lei.
“Importante maka knaar ne’ebé hala’o tuir lei haruka, labele preocupa kona-ba intervensaun ne’ebé iha. Knaar ne’ebé hala’o maka tuir lei haruka,” dehan Rafael de Jesus.
Nia afirma katak, juízes mak tenke foti desizaun tuir lei, no importante atu magistradu sira kontinua hala’o sira-nia knaar ho responsabilidade atu lori justisa ba oin.
Tuir informasaun neebe iha, transferensia ba Juiz husi Tribunal Dili ba iha Tribunal Munisipiu sira nee iha haa,
(ter)
