DILI, STLTIMORLESTE.com – Juíza Ana Paula Fonseca, iha Tersa-Feira, 29/09/2026, prezide julgamentu ba prosesu rua iha Tribunal Judisial Primeira Instánsia Dili (TJPID), ida ho NUC 0050/22 ALSIC no ida ho NUC 0016/22 ALSIC.
Maibé, tanba falta interveniente prosesual, Juíza Ana Paula deside marka fali prosesu sira-ne’e ba loron seluk.
Antes julgamentu hahú, Ofisiál Justisa Tribunal informa ba Juíza katak Sekretaria Judisial la permite nia atu hala’o julgamentu, tanba iha ordem hosi Juiz Administradór.
Juíza Ana Paula Fonseca hateten katak, to’o agora nia seidauk simu notifikasaun kona-ba akta deliberasaun hosi Konsellu Superior Magistratura Judisiál (KSMJ) kona-ba nia transferénsia.
“Relativamente informasaun hosi Sekretaria Judisial interinu, nudar juíza ba prosesu ne’e, atu fó hatene katak to’o aprezente data ami seidauk hetan notifikasaun ba akta deliberasaun Konsellu Superior Magistratura Judisiál kona-ba ami nia transferénsia,” deklara Juíza Ana Paula iha sala julgamentu, Tersa-feira (29/09).
Nia hatutan katak, transferénsia ne’e la’o tanba implementasaun hanesan bain-bain, maibé nia entende katak tenke tuir regra ne’ebé iha. Nia mós informa katak nia sei halo reklamasaun kona-ba desizaun refere.
“Tuir entendimentu no pontu de vista hau nian, hau sei iha kompeténsia iha Tribunal Dili atu bele interven iha prosesu sira ne’ebé distribui mai hau,” dehan nia.
Juíza Ana Paula mós subliña katak, maski ema barak ko’alia kona-ba independénsia Tribunal no juízes, nia sei kontinua asegura nia knaar ho imparsiálidade no independénsia.
Iha parte seluk, Jurista Sérgio Dias Quintas hateten katak, transferénsia juízes tenke konsidera regra no prosedimentu ne’ebé estabelese iha lei, inklui antiguidade no disponibilidade juízes.
Nia esplika katak, se juíz ida la konkorda ho desizaun KSMJ kona-ba transferénsia, nia bele halo reklamasaun tuir mekanismu ne’ebé disponivel. Nia mós hateten katak, tuir nia entendimentu, reklamasaun la suspende automaticamente efeitu hosi desizaun administrativu.
Sérgio Dias Quintas hateten tan katak, se KSMJ mantein desizaun depois reklamasaun, juíz ne’ebé la konkorda bele uza via rekursu kontensiozu ba Tribunal atu husu revizaun kona-ba legalidade desizaun ne’e.
Estatutu Magistradu Judisiál define KSMJ nu’udar órgaun jestaun no disiplina magistratura judisiál, ho kompeténsia kona-ba nomeasaun, kolokasaun, transferénsia no promosaun juízes.
Konstituisaun Timor-Leste mós estabelese katak juízes, iha ezersísiu sira-nia funsaun, independente no tenke tuir Konstituisaun, lei no sira-nia konsiénsia; juízes mós inamovível, exetu iha kazu ne’ebé lei permite.
(ter)
