DILI, STLTIMORLESTE.com – Jurista Timor-oan husu ba Konsellu Superior Magistratura Judisiál (KSMJ) atu foti desizaun ho transparénsia, bazeia ba lei no la kahur ho interese.
Jurista Sérgio Dias Quintas hateten katak, desizaun KSMJ tenke bazeia ba norma, transparénsia no kualidade, tanba desizaun sira ne’e iha impaktu ba kredibilidade setor justisa.
“Hau nia hanoin, KSMJ ba oin tenke foti desizaun ho onestu, transparénsia no kualidade, labele kahur ho interese. Se ida-ne’e kontinua nafatin, hau hanoin ita bele dehan katak setor justisa iha tempu agora hasoru obstákulu lubuk ida, ne’ebé bele afeta kredibilidade KSMJ rasik,” dehan Sérgio Dias Quintas ba jornalista sira iha Tribunal Dili, Tersa-feira (29/09).
Nia hatutan katak, se KSMJ kontinua hasai deliberasaun ne’ebé, tuir nia perspetiva, la bazeia ba norma no transparénsia, situasaun ne’e bele hamosu risku ba setor justisa.
Sérgio Dias Quintas mós afirma katak, iha kolokasaun juízes, tenke konsidera sira-nia antiguidade, kapasidade no esperiénsia.
Nia hateten, Tribunal Dili atende populasaun barak ne’ebé buka justisa no kazu sira mós iha natureza kompleksu. Tanba ne’e, nia konsidera importante atu koloka juízes ho esperiénsia no kualifikasaun adekuada.
Iha parte seluk, akademiku UNTL, Sebastião dos Santos hateten katak setor justisa atu lao ba oin, desizaun sira tenke tuir lei no labele hamosu dúvida iha públiku.
“Hanoin setor justisa atu lao ba oin, desizaun sira ne’ebé foti tenke tuir lei haruka, atu labele hamosu dúvida. Se iha transferénsia ruma, tenke justu atu labele hamosu dúvida,” dehan Sebastião dos Santos.
Nia hatutan, setor justisa tenke hahú hosi servisu Tribunal sira rasik, liuliu iha desizaun ne’ebé envolve juízes, atu hatudu katak instituisaun justisa hala’o knaar tuir lei.
Sebastião dos Santos subliña katak, desizaun ne’ebé foti ho justisa importante atu labele hamosu polémika iha públiku, liuliu kona-ba autoridade judisiál.
(ter)
