DILI, STLTIMORLESTE.com — Enkarregadu Negósius Embaixada Estadus Unidus Amérika (EUA) iha Timor-Leste, Bruce Begnell, hamutuk ho Ministériu Saúde no Autoridade Munisipál Manufahi, entrega ekipamentu médiku prioritáriu, suprimentu médiku no apoiu ba hadi’a fasilidade saúde iha Munisípiu Manufahi.
Entrega ne’e realiza iha Segunda-feira (28/09/2026) no nu’udar parte husi apoiu Projetu ACHIEVE Timor-Leste, ne’ebé hetan finansiamentu husi EUA atu hametin prestasaun servisu saúde no aumenta asesu ba servisu esensiál, liuliu ba saúde inan, bebé foin moris, labarik no nutrisaun.
Tuir komunikadu imprensa Embaixada EUA iha Timor-Leste, ekipamentu no suprimentu ne’ebé fornese bazeia ba nesesidade prioritáriu identifikadu liuhusi avaliasaun konjunta kona-ba prontidaun servisu saúde inan, bebé foin moris, labarik no nutrisaun.
Apoiu ne’e inklui ekipamentu salva-moris ba inan no labarik, suprimentu tratamentu médiku, mobília ba fasilidade saúde no painél solar atu ajuda garante fornecimentu eletrisidade fiável iha postu saúde sira ne’ebé asesu ba eletrisidade limitadu ka la estável.
Aleinde ekipamentu médiku, projetu ne’e mos fornese televizaun no materiál edukasaun saúde ba suku lima, ho objetivu atu hametin edukasaun no informasaun saúde iha komunidade.
Durante serimónia entrega, Bruce Begnell dehan katak, desde Timor-Leste restaura independénsia, EUA kontinua servisu hamutuk ho Governu Timor-Leste atu hametin sistema saúde nasionál no hadi’a saúde povu.
“Durante tinan 20 resin, ita-nia parseria foku ona ba pasu prátiku hirak-ne’ebé apoia família sira atu sai saudável liután, fortalese komunidade sira no sistema saúde nasionál ida ne’ebé reziliente,” dehan Begnell.
Nia hateten katak eventu ne’e hametin liután parseria ne’ebé kleur ona entre EUA no Timor-Leste, liuliu iha área kuidadu saúde primáriu, apoiu ba profisionál saúde iha liña oin no habelar asesu ekuitativu ba servisu saúde esensiál.
EUA, liuhusi apoiu ba Ministériu Saúde, lideransa munisipál no komunidade, kontinua komprometidu atu kontribui ba dezenvolvimentu sistema saúde ne’ebé reziliente no sentradu ba komunidade.
Projetu ACHIEVE Timor-Leste hetan finansiamentu husi Departamentu Estadu EUA no nu’udar parte husi inisiativa globál tinan ualu ne’ebé foka ba saúde no bem-estar labarik, adolexente no inan isin-rua no fó-susu.
Iha Timor-Leste, projetu ne’e implementa husi kompanhia Amerikana Palladium, hanesan parte husi konsórsiu Pact, liuhusi koordenasaun ho Ministériu Saúde no Servisu Saúde Munisipál Manufahi.
(jos)
