DILI, STLTIMORLESTE.com – Prezidente Repúblika (PR), José Ramos-Horta kongratula povu Vietname ba selebrasaun Loron Nasionál Repúblika Sosialista Vietname ba dala 81.
Prezidente Ramos-Horta hato’o mensajen ne’e iha Embaxada Vietname iha Aimutin, Dili, Tersa-feira kalan (29/09/2026), durante selebrasaun Loron Nasionál Vietname.
Prezidente hatete katak, eventu ne’e importante tanba marka selebrasaun Loron Nasionál Vietname dahuluk dezde abertura Embaxada Vietname rezidente iha Dili.
“Data istóriku 2 Setembru 1945 sai marku monumentál iha luta povu Vietname nian. Tuir lideransa Prezidente Ho Chi Minh, Vietname proklama independénsia no liberdade iha Hanoi.” Hatete Ramos.
Prezidente Ramos-Horta hatete katak, Vietname hala’o ona viajen notável, liuliu transformasaun nasionál ne’ebé akontese durante dékada ikus.
Índise Dezenvolvimentu Umanu Vietname sa’e liu 50% dezde 1990, no agora nasaun ne’e tama iha kategoria dezenvolvimentu umanu aas.
Iha área bem-estar sosiál, esperansa moris média iha Vietname aumenta ba liu tinan 73, ne’ebé hatudu avansu iha kuidadu saúde no qualidade moris.
Iha área ekonomia, Vietname sai nasaun ne’ebé nakloke ba komérsiu internasionál, ho rasio komérsiu ba Produtu Internu Brutu besik 170%.
Xefe Estadu hatete katak, Vietname estabelese objetivu nasionál atu atinji kreximentu PIB anuál ho díjitu rua, no hetan estatutu rendimentu médiu-altu iha 2030.
Vietname mós planeia sai nasaun dezenvolvidu ida iha 2045, enkuantu kontinua responde ba mudansa iha ambiente internasionál.
Ambisaun ne’e hala’o iha tempu ne’ebé Vietname hasoru presaun komérsiu globál, kompetisaun estratéjika no tensaun jeopolítika iha nível internasionál.
Iha área teknolojia, Vietname aumenta énfaze ba intelijénsia artifisiál, semikondutór, 5G, enerjia verde no infraestrutura ne’ebé reziliente.
Prezidente Ramos-Horta mós destaka relasaun Timor-Leste no Vietname ne’ebé dezenvolve ona desde estabelesimentu relasaun diplomátika.
“Ita-nia nasaun rua formalmente estabelese relasaun diplomátika iha 28 Jullu 2002. Dezde ne’ebá, amizade habelar iha área polítika, ekonómika, edukasaun no kultura,” dehan Horta.
Ramos-Horta mós hato’o apresiasaun ba apoiu Vietname nian ba Timor-Leste nia adezaun ba ASEAN no kompromisu atu ajuda Timor-Leste partisipa efetivamente iha mekanizmu ASEAN.
Relasaun bilateral Timor-Leste no Vietname kontinua dezenvolve iha área polítika, ekonomia, edukasaun, kultura no kooperasaun rejionál.
(eme)
