DILI, STLTIMORLESTE.com – Ministériu Edukasaun (ME) hamutuk ho ekipa konjunta sei halo verifikasaun ba profesores ne’ebé sofre moras prolongada, ho total liu ema 200 husi Munisipiu Dili no munisípiu sira seluk.
Diretor Nasional Rekursu Umanu iha ME, Joao Amaral, hato’o informasaun ne’e ba STL, Kuarta-feira (30/09/2026).
“Moras prolongada barak mak identifika ona. Iha Munisipiu Dili mos barak mak ami identifika ona. Iha segunda ronda, liu ema 200 mak ita atu verifika tan, inklui Dili no munisípiu seluk ne’ebé presiza identifikasaun,” nia hatete.
Joao Amaral hateten katak, verifikasaun sei haree mos ba orsamentu, tanba iha fulan Outubru sei tama ona prosesu aprezentasaun orsamentu iha Parlamentu Nasionál.
Nia esplika katak objetivu husi ekipa konjunta ne’ebé tun ba terenu mak atu haree diretamente kondisaun professores ne’ebé sofre moras prolongada.
“Objetivu husi ami nia ekipa konjunta tun ba terenu ne’e atu haree professor nia kondisaun. Karik moras ne’e bele trata iha fulan ida ka rua no nia bele rekopera, nia bele fila fali mai servisu. Maibé karik moras ne’e dura tempu naruk, ita bele fó pensaun invalides hodi bele kontinua nia tratamentu,” nia tenik.
Nia hateten katak, bainhira professor ida rekopera husi moras no seidauk atinji idade 65, nia bele halo pedidu atu fila fali hanorin estudante sira iha sala de aula.
Ekipa konjunta ne’ebé sei halo verifikasaun ba professores moras prolongada kompostu husi Komisaun Funsaun Públika (KFP), Ministériu Saúde (MS), Ministériu Solidariedade Sosiál (MSS) no Ministériu Edukasaun.
“Ita tun ba haree no observa mos husi área saúde, ne’ebé Seguransa Sosiál servisu hamutuk ho sira, atu ita bele kontinua halo verifikasaun ba professores ne’ebé iha kondisaun moras,” nia dehan.
Enkuantu ne’e, Direitor Servisu Edukasaun Munisipál Liquica, Julio da Silva, hatete katak iha Liquica mos iha professores balun ne’ebé sofre moras no la ativu hanorin estudante sira tanba sira sei halo tratamentu.
“Ita nia profesores balun iha Liquica ho kondisaun moras no la ativu hanorin ita nia estudante sira, tanba balun sei halo tratamentu,” nia esplika.
Diretor EBC Manleuana, Carlos Correia hatete, katak professores nain rua husi Ensinu Baziku Sentral (EBC) Manleuana iha kondisaun moras no la ativu hanorin estudante sira.
“Ami nia professores sira seidauk hatama karta rekerimentu ruma ba reforma, tanba husi KFP dehan katak sei hein tinan ida ne’e iha teste ba professores foun sira. Bainhira profesores foun sira kompletu ona, bele reforma ona. Maibé la’ós dehan obrigatóriu. Primeiru sei haree uluk ba ida ne’ebé ho kondisaun moras grave liu,” nia afirma.
Nia hateten katak, iha EBC Manleuana, prioridade agora mak profesores nain rua ne’ebé sofre moras grave, enkuantu prosesu seluk sei hein desizaun husi ME.
Profesores nain rua ne’e durante ne’e la ativu hanorin estudante sira iha eskola tanba sira nia kondisaun saúde.
(eme)
