DÍLI, STLTIMORLESTE.com — Prokuradoria Jeral husu prizaun preventiva ba sidadaun Xineza ho inisial ZL, suspeitu neebe komete krime ilísitu droga.
Tribunal Judisial Primeira Instánsia Dili (TJPID), Kuarta-feira, 30 Setembru 2026, kontinua prosesu primeiru interogatoriu ba sidadaun Xineza na’in-rua, ZL no QG.
Prokurador Matias Soares akuzadu arguidu na’in-rua kona-ba alegasaun ba krime Ilisitu Droga, tuir lei numeru 2/2017.
Iha audiénsia, Juiz José Maria rona deklarasaun arguidu na’in-rua. Hafoin interogatoriu remata, Tribunal fó oportunidade ba MP no defeza atu hato’o alegasaun.
Iha alegasaun, Prokurador Matias Soares husu Tribunal aplika prizaun preventiva ba ZL. Ba QG, MP husu proibisaun ba ausénsia no kausaun US$ 5,000 to’o US$ 10,000.
Parte defeza reprezenta hosi advogadu Januário Martins no Octávio Cardozo, husu Tribunal aplika medida aprezentasaun periódika, kausaun no proibisaun ba ausénsia ba arguidu na’in-rua.
Hafoin rona alegasaun hosi parte hotu, Tribunal suspende audiénsia no marka fila-fali iha tuku 17:00 atu rona desizaun ikus kona-ba medida koasaun.
Prosesu ne’e prezide hosi Juiz José Maria, Ministériu Públiku reprezenta hosi Prokurador Matias Soares, no arguidu na’in-rua hetan asisténsia legal hosi advogadu privadu.
Rekorda katak, PSIK no SNI detein sidadaun Xineza na’in-rua iha área Manleuana no Bebonuk, iha madrugada loron 27 Setembru 2026.
Rezultadu teste rápidu hosi laboratóriu PSIK hatudu katak substánsia apreende pozitivu ba vitamina A no metanfetamina.
(ter)
