BAUCAU, STLTIMORLESTE.com — Ekipa Veterinária Munisípiu Baucau kaptura ona asu hakiak ida iha área Dokobere Leten, Suku Buruma, Postu Administrativu Baucau Vila, ne’ebé rezultadu teste laboratóriu hatudu pozitivu vírus rabies.
Nain ba asu, João Bosco da Silva hateten katak, iha loron 28 Setembru, asu refere hahú hatudu mudansa komportamentu, inklui komportamentu agresivu no lakohi han.
Tuir João Bosco, asu ne’e mós duni no tenta atu tata komunidade sira, maibé ema sira konsege hases aan husi asu refere.
Tanba situasaun ne’e, bainhira nia fila husi servisu, iha loron 28 Setembru ne’e nia kontaktu kedas Ekipa Veterinária Munisípiu Baucau atu halo asaun ba asu refere.
Maibé ekipa veterinária halo kapturasaun asu refere iha loron 29 Setembru no submete amostra asu refere ba teste laboratóriu.
“Sira lori asu ne’e ba laboratóriu halo ezaminasaun, detekta katak pozitivu rabies. Asu ne’e sira lori tiha ona ba karantina veterinária nian,” João Bosco hateten ba jornalista sira iha Dokobere Buruma, Tersa (30/09/2026)
Iha sorin seluk, Xefe Departamentu Pekuária Servisu Munisípal Baucau, Agostinho Francisco Xavier, hateten katak ekipa veterinária simu informasaun kona-ba asu suspeitu refere husi komunidade.
Tuir nia, tanba simu informasaun iha parte kalan, ekipa la konsege halo atuasaun imediata. Maibé, iha loron 29 Setembru, ekipa konsege kaptura asu refere no halo teste laboratóriu, ho rezultadu konfirmasaun katak asu ne’e pozitivu rabies.
Agostinho hateten asu refere agora aseguradu iha karantina veterinária Munisípiu Baucau.
“Akontese ne’e iha área eskola nian, alunus barak. Tan ne’e ita presiza halo atuasaun imediata atu halo vasinasaun ba asu sira iha fatin ne’ebá, tanba alunus barak iha ne’ebá,” Agostinho hateten
Nia hateten área afetadu ne’e besik liu Eskola Ensinu Baziku Filial Dokobere Buruma, ne’ebé atende estudante husi nível pré-eskolár to’o terseiru siklu.
Situasaun ne’e halo Ekipa Veterinária Munisípiu Baucau planeia halo kedas vasinasaun ba asu sira iha área Dokobere, enkuantu ba bairo seluk programa vasinasaun seidauk bele hala’o tanba ekipa sei hein orientasaun kona-ba programa vasinasaun masal husi Diresaun Veterinária Nasionál.
Maski nune’e, Agostinho hateten Ekipa Veterinária Munisípiu Baucau prontu atu fó vasina anti-rabies ba asu sira, liuliu iha área afetadu no bainhira komunidade husu asisténsia.
“Ami mós iha esperansa hakarak lao jeral, maibé posibilidade mak la ajuda ami atu la’o Postu hotu-hotu iha Munisípiu Baucau,” Agostinho komenta
Husu Apoiu ba Programa Vasinasaun Masal
Agostinho husu Ministériu Agrikultura, Pekuária, Peskas no Floresta atu aumenta apoiu ba ekipa tékniku veterinária iha Munisípiu Baucau, hodi bele implementa programa vasinasaun masal ba asu sira.
Nia konsidera programa vasinasaun masal importante atu ajuda prevene propagasaun vírus rabies iha territóriu Munisípiu Baucau.
Nia mós apela ba autoridade suku sira no komunidade atu koopera ho ekipa veterinária bainhira ekipa halo vasinasaun, liuliu ba asu sira ne’ebé seidauk hetan vasina anti-rabies.
Agostinho husu komunidade atu nafatin aumenta kuidadu bainhira hasoru asu sira, liuliu iha área ne’ebé identifika ona kazu rabies.
(tom)
