DÍLI, STLTIMORLESTE.com — Tribunal Judisial Primeira Instánsia Dili (TJPID) kondena JMS tinan 3 suspende durante tinan 4, no absolve JET.
Iha leitura akordaun Kuarta-feira (30/09/2026), Juíza Fransisca Cabral hatete katak, arguidu na’in rua konfesa faktus ne’ebé Ministériu Públiku aprezenta.
Tribunal Kolektivu bazeia ba deklarasaun arguidu sira no reforsa ho deklarasaun sasin sira durante prosesu julgamentu.
Tribunal konklui katak la iha prova sufisiente atu kondena JET. Tanba ne’e, JET hetan absolvisaun husi akuzasaun krime ne’ebé Ministériu Públiku aprezenta.
Enkuantu ba JMS, Tribunal konsidera iha prova sufisiente kona-ba krime ne’ebé Ministériu Públiku akuza. JMS hetan pena prizaun tinan 3.
Maibé, ezekusaun pena ba JMS suspende durante tinan 4, ho kondisaun atu la komete krime foun durante períodu suspensaun.
Juíza prosesu fó avizu ba JMS katak se nia komete krime foun durante períodu suspensaun, Tribunal bele revoga suspensaun pena ne’ebé aplika ba nia.
Prosesu ne’e relasiona ho kazu furtu motorizada akontese iha 15 Fevereiru 2026, tuku 10:00 dadeer, iha Merkadu Manleuana, Suku Manleuana, Munisípiu Dili.
Tuir faktus prosesu, lezada Antónia Elzita Mola Varela ba Merkadu Manleuana atu sosa sasán no para motorizada Honda Beat CBS, matríkula W-0038-TL, besik loja “Ohralan”.
Iha momentu ne’ebá, JMS no JEX to’o iha merkadu uza motorizada ho matríkula 5702. Sira la’o hale’u área estasionamentu atu buka motorizada.
Sira haree motorizada lezada nian la xave volante. Tuir akuzasaun, JMS tun husi motorizada no hakbesik ba motorizada lezada nian.
JMS dada no empurra motorizada sai husi área merkadu, ho intensaun atu na’ok. Depois, nia uza xave falsu tipu T-10 atu estraga sistema ignisaun.
JMS halo ligasaun direta hodi liga motór no lori motorizada to’o besik postu kombustível iha Manleuana, antes husik iha fatin ne’ebá.
Bainhira lezada fila, nia haree motorizada lakon ona. Nia kontaktu Francisco Varela, membru Polísia Nasionál Timor-Leste (PNTL) atu husu ajuda buka motorizada.
Francisco Varela ba fatin akontesimentu no verifika imajen CCTV instala iha área besik. Husi análize imajen, nia lokaliza dalan ne’ebé suspeitu sira uza.
Polísia mos lokaliza motorizada ne’ebé lakon para besik kioske ida. Autoridade halo vijilánsia iha área ne’ebá atu identifika ema ne’ebé sei fila fali.
Besik minutu lima depois, JEX hakbesik ba motorizada ne’ebé na’ok, uza motorizada seluk. Bainhira nia tenta foti motorizada, Francisco Varela interseta no detidu nia.
Hafoin dilijénsia polisiál, autoridade sira identifika katak JEX no JMS partisipa iha prátika faktus ne’ebé relasiona ho kazu furtu motorizada.
Tuir akuzasaun, arguidu sira atua ho forma livre, voluntária, konsiente no deliberada, liuhusi komuñaun esforsu no intensaun atu apropria motorizada lezada nian.
Faktus ne’ebé deskreve iha prosesu konsidera tama iha prátika krime furtu agravadu, previstu no punidu iha Artigu 252.º, n.º 1, alínea h), g) no l), Kódigu Penál.
Prosesu ne’e prezide husi painel Tribunal Kolektivu kompostu husi Juíza Fransisca Cabral, Juiz Jose Escurial no Juiz Estajiadu ida.
Ministériu Públiku reprezenta husi Prokurador Bartolomeo de Araujo, enkuantu arguidu na’in rua hetan asisténsia jurídika husi Defensor Públiku, Marsal Mascarinha.
(ter)
