DILI, STLTIMORLESTE.com — Media Tour sei lori jornalista sira ba área fronteira no rural atu aproxima komunidade no hatudu realidade lokal ba públiku.
Sekretáriu Estadu Komunikasaun Sosial (SEKOMS), Expedito Loro Dias Ximenes hatete, liberdade imprensa benefísiu ba jornalista no povu Timor-Leste.
Nia hatete, Governu fó atensaun ba komunikasaun no jornalizmu, tanba jornalista sira sai ponte entre Governu, instituisaun no komunidade.
“Media bele lori realidade povu ba públiku, no preokupasaun komunidade bele hetan atensaun husi instituisaun kompetente,” hatete Expedito iha SEKOMS, kuarta (30/09/2026).
Nia afirma, Governu sei respeita independénsia média, liberdade jornalista sira no prinsipiu jornalístiku, inklui independénsia no imparsiálidade.
Nia mós alerta kona-ba Inteligénsia Artifisiál ne’ebé bele fó benefísiu ba jornalista, maibé iha risku ne’ebé presiza komprende no jere ho responsabilidade.
Nia husu média sosial no plataforma dijitál uza ho responsabilidade, ho informasaun bazeia ba faktu, verifikasaun no étika jornalístika.
Iha fatin hanesan, Prezidente UPJTL, Horacio Babo hatete, organizasaun jornalista haat sei hala’o Media Tour ho apoiu Governu iha área fronteira no rural.
Organizasaun hirak-ne’e inklui UPJTL, AJTL, TLPU no ARCATEL, ho atividade ne’ebé sei konsentra liuliu iha komunidade fronteira no área rural.
Horacio Babo deklara, Media Tour sei aproxima jornalista sira ho komunidade, liuliu iha área rural, atu haree diretamente situasaun no realidade lokal.
“Durante atividade, jornalista sei halo vizita, interasaun no sosializasaun ho lideransa lokal, funsionáriu públiku no komunidade,” nia koalia.
Nia hatutan, jornalista sira sei halo kobertura kona-ba atividade sosial, dezenvolvimentu no dezafiu ne’ebé komunidade sira enfrenta iha área rural.
“Ami hakarak média sai ponte entre komunidade, instituisaun públika no públiku,” nia hatutan.
Nia deklara, atividade sei inklui jornalista 10 hosi média online, imprensa, televizaun no rádio atu garante kobertura liuhusi plataforma oioin.
“Ita nia jornalista sira sei sosializa literasia média ba komunidade no funsionáriu, inklui asesu, uza no fahe informasaun ho responsabilidade,” nia hatete.
Nunee mos Prezidente AJTL, Zevonia Vieira hatete, atividade sei lori jornalista sira ba Bobonaro no Oecusse, enkuantu TLPU sei ba Covalima.
Atividade ne’e sei fó atensaun ba preokupasaun komunidade iha fronteira, inklui edukasaun, saúde no asesu ba servisu públiku.
AJTL mós sei hala’o sosializasaun kona-ba seguransa dijitál ba joven no estudante sira, liuliu iha Munisípiu Bobonaro.
Nia afirma, Media Tour ne’e sei realiza nu’udar parte husi komemorasaun Loron Liberdade Imprensa, ne’ebé sei komemora iha 16 Outubru.
(jen)
